Dan il-kors tad-DegreePlus jiffoka fuq il-mekkaniżmi ewlenin li teħtieġ il-poeżija biex tirnexxi u tqanqal lill-udjenza tagħha. Jiffoka wkoll fuq l-opportunitajiet u l-isfidi kreattivi li toffri din it-tip ta' kitba.
It-tmien sessjonijiet se jitmexxew minn uħud mill-esponenti ewlenin tal-poeżija l-ġdida, poeti li għandhom esperjenza vasta tal-pubblikazzjoni u l-qari f'avvenimenti ewlenin f'Malta u barra minn Malta. Dawn huma Immanuel Mifsud, Antoine Cassar, Simone Inguanez, Adrian Grima, Claudia Gauci, Caldon Mercieca, u Walid Nabhan.
Fil-kors se tagħti sessjoni wkoll Jasmine Donahaye, poetessa u akkademika ewlenija minn Wales li tgħallem il-kitba kreattiva part-time fl-Università ta' Swansea. Dr Donahaye se tkun Malta fuq stedina ta' Inizjamed u Literature Across Frontiers.
Il-kors jinsisti fuq il-ħtieġa li dawk li jiktbu l-poeżija jinvestu l-ħin u l-enerġija kreattiva tagħhom mhux biss f'kitba li tfittex l-aħjar espressjoni possibbli, imma qabelxejn fil-qari tal-poeżija, inkluża l-poeżija Maltija u barranija li qed tinkiteb illum. Kull sessjoni ta' sagħtejn tinqasam bejn siegħa ta' struzzjoni u riferiment għal poeżiji ewlenin, u siegħa ta' kitba prattika li tesperimenta b'mekkaniżmi u strateġiji differenti.
Fost it-temi li se jittratta l-kors hemm l-għażla bejn il-poeżija lirika u narrattiva u bejn il-forom tradizzjonali u ħielsa; se jkun esplorat ukoll ir-rwol fundamentali tar-ritmu u tal-avventura figurattiva li ħafna drabi tfittex il-poeżija.
Il-kors se jħeġġeġ lill-parteċipanti biex jesperimentaw b'temi mhux tas-soltu, temi attwali li spiss ma jingħatawx l-attenzjoni li jistħoqqilhom, u għalhekk joffru ħafna opportunitajiet interessanti lill-poeti l-ġodda.
Fil-qosor
Kors tad-DegreePlus minn Frar sa Mejju 2012
Dan il-kors fuq il-kitba tal-poeżija hu miftuħ għall-istudenti kollha tal-Università u jibda l-Erbgħa, 29 ta' Frar 2012, f'12pm. Ikun hemm sessjoni waħda ta' sagħtejn kull nhar t'Erbgħa.
Fl-aħħar tal-kors, li jitniżżel fit-transcript finali, jingħata wkoll ċertifikat lill-istudenti kollha li jattendu.
Żuru dan is-sit għal tagħrif ieħor.
