Id-Dipartiment tal-Malti beda fit-tletinijiet. Il-Prof. Ġużè Aquilina bena d-dipartiment u ħadem tista' tgħid waħdu fl-oqsma tal-letteratura u tal-lingwa. Minn dak iż-żmien inbidlu ħafna l-affarijiet. Illum, tmien letturi jgħallmu qasam jew ieħor skont l-ispeċjalizzazzjoni tagħhom. Minbarra l-korsijiet ta' filgħodu, id-Dipartiment jorganizza wkoll żewġ korsijiet filgħaxija.

Id-Dipartiment huwa attiv ukoll ’il barra mill-Università, jipparteċipa fil-Kunsill Nazzjonali tal-Ilsien Malti u jikkollabora mad-Direttorat tal-Edukazzjoni fil-bordijiet tal-għażla tal-kotba tal-iskola u fit-tmexxija konġunta ta' taħriġ professjonali għall-għalliema li jsir matul is-sena.