https://www.um.edu.mt/library/oar/handle/123456789/79844 2026-04-15T19:24:07Z 2026-04-15T19:24:07Z https://www.um.edu.mt/library/oar/handle/123456789/101969 2022-09-26T05:05:04Z 2021-01-01T00:00:00Z

Title: Maskulinità fraġli fir-rakkont ‘Fl-Isem tal-Missier (u tal-Iben)’ u f’’Jutta Heim’ Abstract: Il-maskulinità tixħet dawl fuq il-karatteristiċi li jsawru r-raġel. Din it-teżi tistħarreġ aktar mill-viċin il-maskulinità f’żewġ xogħlijiet ta’ Immanuel Mifsud, Fl-Isem tal-Missier (u tal-Iben) u Jutta Heim. Fil-kuntest ta’ letteratura Maltija li fiha r-raġel jingħata ħafna attenzjoni, dan l-istudju jħares lejn xi jsawwar l-irġiel differenti ta’ Mifsud u fiex tissarraf il-maskulinità tiegħu f’dawn iż-żewġ rakkonti. L-għan ewlieni tat-teżi hu li nanalizza l-maskulinità, li fiha nfisha hija fraġli, u l-mod jirrappreżentawha dawn ix-xogħlijiet partikolari ta’ Mifsud. Peress li s-suġġett tal-maskulinità minnu nnifsu huwa suġġett tabù, huwa importanti li meta l-letteratura tistħarrġu, il-kritiċi jkunu kapaċi jintebħu bis-sinifikat u l-immedjatezza li jġib miegħu. F’dan ir-rigward nemmen li aktar ma nanalizzaw ir-rappreżentazzjoni talmaskulinità fil-letteratura bir-reqqa, aktar jiddgħajjef it-tabù madwar das-suġġett. L-argument prinċipali tat-teżi hu li l-maskulinità, aspett kruċjali tal-identità tar-raġel, titqies bħala xi ħaġa li għandha sehem fil-fraġilità tar-raġel. It-teżi għandha wkoll l-għan li tħares lejn kif il-maskulinità tinfluwenza d-dimensjoni politika li tolqot lir-raġel fuq livell personali. L-argument prinċipali hu li l-maskulinità hija fraġli għax ir-raġel huwa bniedem, bil-fraġilità kollha tiegħu. It-teżi bl-ebda mod ma tqis il-maskulinità bħala xi ħaġa li hija minnha nfisha ħażina. Minflok tagħmilha ċara li huma l-forzi soċjopolitiċi li jinfluwenzaw il-mentalità li jitfgħu l-maskulinità f’dell ikrah. It-tema tal-maskulinità fraġli hija rikorrenti f’Mifsud, speċjalment f’dawn ir-rakkonti li jagħtuha attenzjoni partikolari. L-ewwel kapitlu jipproponi sfond teoretiku għall-istudju u l-iskejjel ta’ ħsieb li nuża biex insostni l-argumenti tiegħi. Ninqeda b’għadd ta’ xogħlijiet minn femministi fil-qasam tat-teorija tal-kultura u studjużi oħra mill-qasam tas-soċjoloġija u l-psikanaliżi, iżda xorta waħda nqiegħed fuq quddiem ir-rabta tal-argumenti tiegħi mat-testi letterarji ta’ Mifsud.Lewwel kapitlu jagħti indikazzjoni teoretika tar-rotta li taqbad it-teżi. L-istudji ta’ R.W. Connell, Freud, Mario Jacoby u oħrajn janalizzaw il-problemi li hemm fil-maskulinità, speċjalment fil-mod kif is-soċjetà tinqeda b’ċerti mudelli li mhux biss jinfluwenzawha imma jaħkmu l-mod ta’ ħsieb u l-emozzjonijiet maskili. Ir-rakkonti ta’ Mifsud huma differenti minn xulxin imma t-tnejn jittrattaw il-fraġilità li hemm f’maskulinitajiet partikolari. Fil-każ ta’ Fl-Isem tal-Missier, it-tieni kapitlu ta’ din it-teżi, nitkellem dwar il-paternità u l-influwenza soċjopolitika fuq il-maskulinità tal-missier. Barra minn hekk inħares lejn ilkunflitt psikoloġiku bejn il-missier u l-iben fuq livell. Dak kollu li jseħħ fid-dimensjoni politika jħalli impatt fuq l-individwu fuq livell psikoloġiku. Peress li dar-rakkont huwa mmexxi minn impulsi awtobijografiċi ħassejt li għandi ninkludi spunti mix-xogħol li għamlet Susannah Radstone f’The Sexual Politics of Time fejn titkellem dwar il-qrara u nnostalġija. It-teżi tanalizza l-mixja psikoloġika li jagħmel Mifsud lura fl-imgħoddi tiegħu fejn jerġa’ jieħu s-sura tat-tifel biex janalizza hu stess ir-relazzjoni tiegħu ma’ missieru. Mifsud ir- raġel adult u matur iħares lejn ċerti episodji li jagħtu ħjieltal-fraġilità sigrieta ta’ missieru u jippreżentaw l-istampa tal-maskulinità ideali li s-soċjetà kienet tippretendi li jkollha. Permezz ta’ Postcolonial Masculinities ta’ Amal Treacher Kabesh inħares lejn l-influwenza imperjalista fil-mentalità tar-raġel Malti u nara xebh bejn il-mod kif il-bidliet soċjopolitiċi jinfluwenzaw lir-raġel fuq livell psikoloġiku imma wkoll fuq il-livell emottiv li ħafna drabi huwa moħbi. Fit-tielet kapitlu li jittratta lil Jutta Heim inħares lejn naħa mudlama tal-bniedem: innarċisiżmu. Għalkemm it-teżi ma titkellimx dwar in-narċisiżmu mil-lenti psikjatrika, ninqeda bix-xogħol ta’ Mario Jacoby u Freud biex nagħti prominenza lill-falliment filmaskulinità ta’ Erik Xerri. Inqis lil Erik bħala raġel mimli bih innifsu, immexxi kompletament minn kilbiet sesswali biex iħossu maskili. Nittratta wkoll il-figura immaġinarja ta’ Jutta bħala l-mara ideali li Erik kontinwament ifittex iżda qatt ma jsib għax ma teżistix. Mifsud jirrakkonta l-istorja ta’ raġel li huwa dgħajjef mhux għax jaħbi l-fraġilitajiet tiegħu jew għax huwa fraġli, imma għax huwa superfiċjali. Hawnhekk nipproponi analiżi bir-reqqa tal-qagħda psikoloġika tiegħu u kif ninterpretah bħala raġelli jirrappreżenta l-waqgħa tal-maskulinità. Iż-żewġ rakkonti ta’ Mifsud norbothom flimkien fir-raba’ kapitlu meta nitkellem fuq il-poter. Hawnhekk nirreferi għal numru ta’ studjużi bħal Connell biex inqiegħed ilmaskulinità f’kuntest li jipprova jispjega minn fejn jinbtu l-fraġilitajiet tagħha. Mingħajr ma nneħħi l-fatt li l-fraġilità hija parti mill-personalità tal-bniedem, inqis is-soċjetà u l- poter politiku bħala elementi li jinqdew b’mudelli ideali ta’ kif ir-raġel għandu jġib ruħu fissoċjetà. Dan iwassal għal ħafna pressjoni fuq il-psike maskili li fi rġiel bħal Erik tqanqal imġibiet maċisti bl-iskop li jgħattu d-dgħufijiet u l-insikurezzi tagħhom. It-teżi hija interpretazzjoni waħda tal-maskulinità f’dawn ir-rakkonti u l-għan aħħari tiegħi hu li nixħet iktar dawl fuqha, mhux biss biex tinftiehem aħjar, iżda wkoll biex napprezzaw ix-xogħol sublimi ta’ Mifsud li bl-istil tiegħu jniggeż dak li hu falz u fl-istess ħin jaċċenna għal dak li jagħmel il-bniedem. Description: M.A.(Melit.)

2021-01-01T00:00:00Z https://www.um.edu.mt/library/oar/handle/123456789/89782 2022-02-24T08:41:57Z 2021-01-01T00:00:00Z

Title: Id-djalettika tal-kanonu : il-kuntest letterarju Malti Abstract: Din it-teżi tipproblematizza l-idea tal-kanonu letterarju billi tapplika d-diskors internazzjonali dwarha għall-kuntest letterarju Malti. L-istħarriġ dwar l-eżistenza tal-aqwa letteratura u tal-proċess ta’ kif din tingħaraf isir permezz ta’ analiżi tat-testi teoretiċi u permezz ta’ diskussjoni dwar kif aspetti pragmatiċi, bħar-rikonoxximent akkademiku, ir-reklamar, l-andament tas-suq, l-għoti tal-premjijiet letterarji, is-selezzjonijiet tal-bordijiet tas-sillabu tal-letteratura, u l-għażla ta’ xogħlijiet lokali biex jiġu tradotti, jinfluwenzaw il-proċess tal-kanonizzazzjoni letterarja. Hawnhekk isir skrutinju essenzjali tal-kriterji li fuqhom jiġu bbażati l-ġudizzji fundamentali li jeżaltaw xogħlijiet letterarji meqjusa bħala superjuri bil-konsegwenza li jitwarrbu oħrajn meqjusa bħala inferjuri. Għaldaqstant, din it-teżi tista’ titqies ukoll bħala eżerċizzju li jistħarreġ il-validità u l-funzjonabbiltà tal-kanonu bħala kejl tal-kwalità letterarja jew bħala mekkaniżmu li jistabbilixxi l-istandards li l-kittieba jridu jilħqu. Dan ma jimplikax li kull standard stabbilit mill-kanonizzaturi huwa dejjem ġustifikabbli. Għalhekk fil-qalba ta’ din it-teżi ssir ukoll diskussjoni dwar l-eżistenza ta’ kriterji assoluti u dwar is-suġġettività tal-kanonizzaturi li inevitabbilment tinfluwenzahom fid-deċiżjonijiet tagħhom. Imnebbħa mill-attenzjoni akkademika li dan is-suġġett beda jingħata speċjalment mis-snin tmenin tas-seklu għoxrin ’il quddiem, it-teżi tipproponi l-istudju applikat ta’ din l-idea fil-qafas li toffri x-xena letterarja lokali. Minkejja li din l-idea qatt qabel ma ġiet diskussa formalment fil-kuntest Malti, matul l-istorja relattivament qasira tal-letteratura Maltija, diversi letterati ewlenin tkellmu, spiss indirettament, dwar il-kanonu letterarju Malti. Kif ġara lil hinn mill-kuntest lokali, hemm min ikkontesta l-idea tal-kanonu letterarju billi ppreżentaha bħala mekkaniżmu soċjali li jaqdi l-ideoloġija politikament u intellettwalment predominanti tal-mument. F’Malta wkoll, xi kittieba li jridu joħolqu spazju għalihom infushom fil-kuntest letterarju li jiffunzjonaw fih, xi drabi jaslu jiċħdu t-tradizzjoni jew l-idea ta’ kanonu stabbilit. Iżda t-tneħħija tal-kanonu preċedenti twassal biex awtomatikament jinħolqu kanoni ġodda li jiffavorixxu ideoloġiji ġodda. Dan iwassal biex aktar milli x-xogħlijiet kanoniċi jiġu akkużati li huma l-qaddejja fidili ta' xi tip ta’ aġenda moħbija tal-klassi dominanti, hemm iċ-ċans li l-antikanonisti jiġu akkużati mill-apoloġisti tal-kanonu li huma l-qaddejja ta’ xi grupp soċjali. Filwaqt li dan il-proċess ikompli jsostni l-“gwerer” tal-kanonu u r-rilevanza tal-istudji dwarhom, l-idea li tħott knisja biex tibni oħra toħloq il-bżonn li jiġu analizzati l-motivi moħbija li jwasslu għal dawn il-bidliet kostanti. Dan l-istudju mhuwiex intenzjonat biss biex jintroduċi lokalment id-diskussjoni tal-idea tal-kanonu letterarju; hawn tiġi eżaminata wkoll il-possibbiltà li tingħaraf l-eżistenza tal-kanonu letterarju Malti. Għal dan il-għan it-teżi tipproponi perspettiva ewlenija fl-applikazzjoni tal-idea tal-kanonu fil-kuntest ta’ letteratura ċkejkna li għandha karatteristiċi u limiti partikolari. Permezz tax-xogħol ta’ ħassieba bħal Gramsci, Rancière, Swirski, Kolbas, Showalter, Friggieri u Baldacchino, din l-analiżi tad-djalettika dwar il-kanonu letterarju tipproponi fost l-oħrajn id-djalogar u n-negozjar iktar milli l-konfrontazzjoni. Dan iwassal għal approċċ idjosinkratiku li jfittex it-triq tan-nofs bejn il-perspettiva konservattiva u dik liberali li spiss iddominaw id-dibattitu kanoniku. Fid-dawl ta’ dak li qalet Casanova, hawnhekk tiġi esplorata wkoll il-proposta li l-idea tal-kanonu letterarju ma tibqax titqies biss fis-sens dejjaq tagħha imma tiġi pperċepita bħala struttura mutabbli, struttura li paradossalment issir interessanti biss jekk tibqa’ toffri spazju li fih jista’ jseħħ dibattitu. L-attitudni ewlenija li tissuġġerixxi din it-teżi u li tista’ tiġi applikata fl-istadji fundamentali tal-proċess lokali talkanonizzazzjoni letterarja hija waħda ta’ bilanċ. Il-kompromess li jista’ jintlaħaq fl-agora tad-dibattitu kanoniku bejn ir-rispett lejn it-tradizzjoni u s-sensittività li tirreġistra l-innovazzjoni jiġi propost bħala l-avviċinament meħtieġ fil-konfront ta’ letteratura fraġli li ma tippermettix li tiċħad l-aqwa letteratura ta’ epoka biex minflokha tpoġġi oħra. Description: Ph.D.(Melit.)

2021-01-01T00:00:00Z https://www.um.edu.mt/library/oar/handle/123456789/82089 2021-10-14T04:37:10Z 2021-01-01T00:00:00Z

Title: Il-kostruzzjoni tan-nazzjon fil-poeżija ta’ Oliver Friggieri Abstract: Din it-teżi tħares lejn kif il-lingwa poetika ta’ Friggieri tirrakkonta s-soċjetà permezz tal-għodod kollha li għandu għad-dispożizzjoni tiegħu l-poeta, fosthom l-istruttura u l-għażla tal-versi, bħat-tħaddim regolari tal-endekasillabu, li jħallu sens ta’ dinjità, patrimonju u ordni. Friggieri jibqa’ jħaddem ir-rima tradizzjonali anke jekk qed jittratta temi kurrenti espressi b’metafori kumplessi. Għalhekk, il-profondità simbolika tal-poeżija aktarx tinħeba taħt is-sempliċità tas-saff tal-wiċċ. Friggieri jagħti importanza lill-metafora biex permezz tagħha joħroġ it-tensjoni soċjali li jara f’Malta ta’ żmienu li xi drabi tidentifika u żżewweġ naħat opposti. Apparti l-analiżi tal-poeżiji, qed ninkludi wkoll intervista personali ffilmjata mal-poeta li hemm verżjoni traskritta tagħha fl-appendiċi. Din l-intervista għamiltha biex nikseb riflessjonijiet poetiċi, politiċi, u soċjali tal-poeta dwar il-ġrajjiet u s-sitwazzjonijiet li kiteb fuqhom fil-poeżiji. Din l-intervista tista’ tgħin ukoll lil riċerkaturi futuri li se jistudjaw dawn ilpoeżiji ta’ Friggieri. L-intervista hi bbażata fuq mistoqsijiet li huma essenzjalment mibnija fuq l-istqarrijiet u l-kitbiet tal-poeta nnifsu dwar il-letteratura tiegħu, skont teoriji li użajt fit-teżi u fid-dawl tas-sitwazzjonijiet politiċi nazzjonali li minnhom il-poeta ħa l-ispirazzjoni tiegħu. Biex nanalizza l-poeżiji ridt niddetermina liema skejjel ta’ kritika kelli naqbad u liema studji nuża. Kull kapitlu fit-teżi hu msejjes fuq teoriji letterarji u soċjoloġiċi li permezz tagħhom stajt naqra l-poeżiji ta’ Friggieri. Fil-ħarsa kritika li nippreżenta fl-ewwel kapitlu nittratta l-iskola tal-kritika tal-Marxiżmu u nistħarreġ in-nazzjonaliżmu. Ninqeda bil-Marxiżmu biex nikkuntestwalizza l-letteratura u biex nifhem kif il-valuri li jidhru fil-poeżiji jirrelataw mal-valuri fis-soċjetà ta’ żmien partikolari. Għaldaqstant, kif jissuġġerixxu l-Marxisti, infittex interpretazzjoni konkreta aktar milli interpretazzjoni idealista u universali. Ix-xogħol letterarju hu mistħarreġ fit-totalità tiegħu, mil-lat stilistiku u mil-lat tematiku li jirriflettu l-kontradizzjonijiet politiċi u soċjali li jippreżenta l-poeta. Il-Marxisti jemmnu li r-realtajiet li nġarrbu huma lkoll materjali, u għalhekk, l-oriġini ta’ dawn ir-realtajiet tinsab fil-forom tal-produzzjoni. B’dan il-mod, jitilgħu fil-wiċċ aspetti ideoloġiċi kontemporanji u jiġu kkjarifikati. Il-perspettiva Marxista fil-letteratura tqanqal lill-qarrejja biex jattakkaw il-forzi oppressivi tan-nazzjon. It-teorista Marxista Terry Eagleton jittratta l-pożizzjoni Marxista dwar ir-rabta tal-letteratura mad-dilemmi soċjali. Dawn id-dilemmi mhux biss huma fuq livell soċjali imma wkoll fuq livell nazzjonali, u għalhekk, użajt l-analiżi tan-nazzjonaliżmu bħal 'Imagined Communities' ta’ Benedict Anderson biex nistħarreġ il-kategorija tal-“aħna” li tiddistingwi ruħha mill-kategorija tal-“huma” abbażi ta’ identitajiet uniċi, fil-komunitajiet politiċi immaġinati. Anderson għaraf iċ-ċentralità tan-nazzjonaliżmu, anke fi proġetti politiċi progressivi bħall-anti-imperjaliżmu u s-soċjaliżmu, tant li, xi kultant, ingħata aktar prominenza mill-proġett progressiv innifsu. Minkejja li bħala studjuż kien jidentifika ruħu l-aktar mat-tradizzjoni politika u intellettwali tal-Marxiżmu, Anderson deherlu li l-Marxiżmu ma rnexxilux jagħmel analiżi xierqa tan-nazzjonaliżmu bħala fenomenu ewlieni. Fit-tieni kapitlu nistħarreġ it-temi ewlenin u l-istil li juża Friggieri biex jikteb il-poeżiji. Għad li Friggieri kien minn tal-ewwel li laqa’ l-qawmien letterarju li jixhed xewqa għallħelsien mill-insularità u l-medjokrità nazzjonali u letterarja, xorta baqa’ juża stil essenzjalment Romantiku, speċjalment il-vers tal-ħdax. Din il-lehma ta’ Friggieri tat lok għassempliċità profonda, b’versi rrimati u b’kontenut li aktarx jappella għal udjenza wiesgħa, imma li fl-istess ħin tħalli lill-qarrejja jgħumu f’interpretazzjonijiet aktar profondi. Il-poeta jrid iqanqal lill-poplu biex jeżamina l-identità nazzjonali u fl-istess ħin jippreservaha. F’din l-identità Friggieri jara dawk li jqishom bħala karatteristiċi Mediterranji li jrid jaffermahom u jridhom ukoll jinfluwenzaw lill-poplu biex iħares dak li kiseb bħala nazzjon. Għad li dawn huma karatteristiċi Maltin u Mediterranji ma jfissirx li huma addottati minn kull ċittadin Malti. Fit-tielet kapitlu jissokta d-diskors dwar il-poeżija nazzjonalista, poeżija miktuba minn poeta li huwa meqjus bħala mudell għall-fervur idealistiku u t-tama, anke jekk it-tama hi żgħira jew impossibbli. F’dan il-kapitlu, nistħarreġ l-irwol ta’ Friggieri bħala poeta u rappreżentant tal-poplu tiegħu. Bil-poeżija jittratta diversi aspetti politiċi, nazzjonali u soċjali bil-għan li jqanqal liċ-ċittadini fil-pajjiż. L-aspetti soċjali diversi li tmiss il-letteratura jitilgħu fil-wiċċ u jolqtu liċ-ċittadini f’epoki differenti. Jekk il-poeti jinjoraw is-sitwazzjonijiet ta’ żmienhom, jirriskjaw li x-xogħol tagħhom jitwarrab u ma jappellax għall-qarrejja. Għaldaqstant, il-poeżija ssir ħtieġa aktar milli delizzju, bżonn li l-poeta joħroġ dak li hemm fih ħalli jitleħħen dak li jqisu bħala t-tiġrib nazzjonali, għax is-sentimenti ta’ wieħed, isiru sentimenti ta’ ħafna minħabba li l-poeta hu wieħed miċ-ċittadini. Il-poeta bħala ġenju joħloq arti b’ċerta sengħa u b’teknika li kapaċi tiġġarrab minn kull bniedem mingħajr eċċezzjoni, arti li biha Friggieri jesprimi kemm il-glorji kif ukoll in-niket tal-pajjiż. Fir-raba’ kapitlu nistudja kif Friggieri jikxef id-difetti tal-pajjiż bħall-partiġjaniżmu u l-vjolenza politika f’pajjiż li jarah bħala tribù maqsum bejn żewġ fazzjonijiet li jxejru żewġ bnadar differenti. Hawnhekk nanalizza t-terminu antropoloġiku tat-tribù, anke permezz ta’ studji li saru minn Jeremy Boissevain dwar is-soċjetà Maltija, biex inkun nista’ nifhem aħjar għaliex Friggieri jsejjaħ lil Malta tribù. F’dan il-kapitlu nistħarreġ il-vjolenza politika u l-qtil brutali taż-żewġ vittmi tal-politika minħabba li Friggieri jikteb numru ta’ eleġiji li fihom effettivament jimmitizzahom. Il-vjolenza u l-partiġjaniżmu huma riżultat ta’ impożizzjoni kontinwa tal-politiċi fuq iċ-ċittadini, sitwazzjoni li nistħarriġha fid-dawl tal-Panottiċiżmu ta’ Foucault. Jekk iċ-ċittadini jikkonformaw mingħajr ma jiddubitaw, ikunu leali lejn il-mexxejja tagħhom u jwettqu dak kollu li jġagħluhom jagħmlu. Friggieri jara soċjetà marida b’valuri foloz li għandha bżonn tirriforma ruħha mill-qiegħ. Description: M.A.(Melit.)

2021-01-01T00:00:00Z https://www.um.edu.mt/library/oar/handle/123456789/80029 2021-08-19T05:07:48Z 2021-01-01T00:00:00Z

Title: “O mħabba!” : il-poeżiji ta’ Victor Fenech dwar l-imħabba Abstract: It-teżina tesplora l-imħabba bejn mara u raġel kif inhi ppreżentata fil-poeżiji ta’ Victor Fenech. Il-bażi teorika adottata fl-analiżi tal-poeżiji hija dik ta’ Platun u tal-kritiċi Femministi Simone de Beauvoir, Julia Kristeva u Luce Irigaray. It-teżina hija maqsuma skont l-esperjenzi differenti tal-imħabba li joħorġu mill-kitbiet ta’ Fenech. Xi poeżiji ttrattati fit-teżina jiffukaw fuq l-importanza u l-ħtieġa tal-imħabba f’ħajjet il-bniedem. Poeżiji li huma xhieda tal-imħabba fis-sabiħ tagħha huma wkoll diskussi. Is-sbuħija fiżika tal-mara hija deskritta fil-poeżiji ta’ Fenech, b’referenza għall-fehmiet ta’ Platun. Din l-istess sbuħija tnibbet ix-xewqa għal relazzjoni ta’ mħabba, li Fenech ukoll jippreżenta f’xogħlijietu. Il-poeta ma jinjorax l-esperjenzi diffiċli tal-imħabba, bħal meta tintemm relazzjoni, fil-poeżiji tiegħu, li huma evalwati b’diwi fuq il-ħsibijiet ta’ De Beauvoir u Kristeva b’mod partikolari. Fenech jixħet ukoll dawl fuq l-imwiet f’koppja fil-poeżiji. Is-sentimenti li jikkawżaw l-esperjenzi tal-imħabba huma wkoll evidenti fil-poeżiji ta’ Fenech, kemm dawk ta’ gost kif ukoll ta’ niket. Mill-analiżi tal-poeżiji, huwa ċar li Fenech iħares b’ambivalenza lejn ċerti aspetti tal-ħajja fosthom l-attivitajiet sesswali bla impenn emozzjonali. Għalkemm Fenech kontinwament jindirizza lill-maħbuba tiegħu fil-poeżiji u jagħti lill-qarrejja x’jifhmu li jipprova joħloq djalogu bejn il-maħbubin, kif il-kritiċi Femministi bħal Irigaray tant esiġew li għandu jsir, hija l-vuċi tal-poeta jew tal-persona li tidwi matul il-poeżiji. L-istess ottika maskili tidher partikolarment fil-poeżiji dwar l-esperjenzi sesswali, fil-poeżiji ta’ tradiment u l-kollass taż-żwieġ, kif ukoll f’dawk li jikkonċernaw il-mewt tal-maħbuba. Description: B.A. (Hons)(Melit.)

2021-01-01T00:00:00Z