https://www.um.edu.mt/library/oar/handle/123456789/118462 Mon, 27 Apr 2026 02:30:49 GMT 2026-04-27T02:30:49Z https://www.um.edu.mt/library/oar/handle/123456789/120257 Title: Il-kwalitajiet emerġenti fin-novella Maltija tal-bidu tas-seklu wieħed u għoxrin Abstract: Din ir-riċerka se tħares lejn tliet novelliera Maltin tal-bidu tas-seklu wieħed u għoxrin (Clare Azzopardi, Pierre J. Mejlak u Walid Nabhan) u lejn il-kurrenti u linfluwenzi li jinsabu fin-novelli tagħhom. Il-Postmoderniżmu, il-Kożmopolitaniżmu u lFemminiżmu tat-tielet mewġa, anki jekk fi gradi differenti, ġew osservati fit-tlieta li huma u għalhekk l-analiżi se tkun qiegħda ssir b’referenza għal dawn it-tliet kurrenti. Minkejja dawn il-pożizzjonijiet komuni hemm ukoll elementi differenti bejn it-tliet kittieba u dan l-istudju se jkun qiegħed iħares lejn il-kwalitajiet, simili kif ukoll differenti, li qegħdin jidhru f’dawn ix-xogħlijiet. In-novelli se jitpoġġew f’qafas storiku Malti u barrani. Il-libertà tal-espressjoni u l-liberalizzazzjoni tal-media taw palata sabiex il-kittieba jibdew jiktbu dwar temi tabù b’lingwaġġ skjett u bdew jinkludu anki diskors storiku u politiku dwar it-tmeninijiet f’Malta fin-novelli tagħhom. Imbagħad, l-użu tat-teknoloġija u l-mezzi diġitali li raw ilbidu tagħhom f’Malta fid-disgħinijiet, kompla jqarreb lill-Maltin lejn pajjiżi barranin. Din il-qrubija kompliet tissaħħaħ bis-sħubija ta’ Malta fl-Unjoni Ewropea li bis-saħħa tagħha l-Maltin saru wkoll ċittadini Ewropej. Għaldaqstant, ir-rakkonti huma wkoll imnebbħa mill-kultura barranija, partikolarment tal-Punent, kultura li kulma jmur ilMaltin qegħdin jakkomodaw dejjem iżjed għaliha. Fid-dawl ta’ dan kollu se jiġi mistħarreġ kif il-ġeneru tan-novella f’Malta qiegħed jinbidel u liema huma dawk l-elementi li qegħdin isawruh, anki jekk it-tliet awturi għandhom kwalitajiet differenti minn xulxin. Description: M.A.(Melit.) Sun, 01 Jan 2023 00:00:00 GMT https://www.um.edu.mt/library/oar/handle/123456789/120257 2023-01-01T00:00:00Z https://www.um.edu.mt/library/oar/handle/123456789/120256 Title: L-oralità riflessa fil-lirika : il-marċi brijużi tas-Soċjetà Mużikali Trinità Qaddisa, Marsa A.D. 1949 Abstract: 1.1. L-Oralità Riflessa fil-Lirika: Il-Marċi Brijużi tas-Soċjetà Mużikali Trinità Qaddisa, Marsa A.D. 1949 : Din it-teżi tiffoka kif l-oralità hi riflessa fil-lirika tal-marċi brijużi, speċifikament tal-marċi brijużi li jinsabu fil-libretti tas-Soċjetà Mużikali Trinità Qaddisa, Marsa A.D. 1949, u li jitkantaw mill-partitarji ta’ din l-għaqda waqt il-marċi li jsiru fil-ġimgħa talFesta. Dawk li għandhom għal qalbhom il-festa tar-raħal tagħhom ikunu midħla ta’ għaqda jew oħra li jaħdmu sabiex il-festa jkun fiha l-isbaħ ċelebrazzjonijiet, kemm biex ifaħħru l-patruni tal-lokal, kif ukoll jgħollu isem l-għaqda tagħhom, jew anke jaħdmu mal-Knisja jekk jippreferu li ma jassoċċjawx ruħhom ma’ għaqda partikolari. Minn naħa tiegħi, bħala s-Segretarju tal-Kummissjoni Trinitarji fi ħdan din is-Soċjetà, kien naturali għalija li nagħżel li niffoka t-teżi tiegħi fuq il-marċi ta’ din l-għaqda tant għal qalbi għax kont naf li nista’ noffri perpesttivi u nagħmel osservazzjonijiet minn ġewwa. Għalkemm ħadd mill-familja tiegħi mhu midħla tal-ebda għaqda tal-festa filMarsa, minn ta’ età żgħira kont naffaxxina ruħi meta nisma’ l-marċi brijużi li jindaqqu fit-toroq, tant li kont nitlob lil ommi biex tniżżilni l-marċ tal-Ħadd filgħodu, u meta kbirt ftit u kont naffaxxina aktar ruħi meta bdejt nidħol fil-Każin tal-Banda ma’ xi ħbieb. Ta’ 12-il sena ġejt avviċinat mis-Segretarju tal-Każin Byron John Sammut, biex nidħol membru fil-Kummissjoni Trinitarji, u llum il-ġurnata għandi l-rwol ta’ segretarju. Din l-esperjenza kellha sehem kbirfl-għażla li ħadt biex naħdem it-teżi fuq il-marċi ta’ dan il-każin li dejjem ħassejtni parti minnu. Għaldaqstant, f’din ir-riċerka, apparti xi kuntesti storiċi li ħassejt li kienu importanti biex il-qarrejja jkunu jafu fuq is-Soċjetà, analizzajt aspetti differenti li jispikkaw f’dawn il-marċi, bħat-tekniki letterarji fil-lirika tal-marċi brijużi, li apparti li jgħinu l-qarrejja jifhmu x’jinkludi marċ brijuż, iġibuhom konxji ta’ dak li jsir waqt iċ-ċelebrazzjonijiet tal-marċi u jagħmluhom aktar familjari mad-dinja tal-festa. 1.2. L-Għanijiet ta’ din ir-Riċerka : L-għan primarju ta’ dan l-istudju hu li niġbor il-marċi brijużi li huma l-aktar qawwija u popolari fost il-partitarji tal-Każin tal-Banda u nanalizza kif l-oralità tidher fil-lirika tal-istess marċi. Permezz ta’ din l-analiżi nesplora mill-qrib kif jiġu ċċelebrati lmarċi organizzati mis-Soċjetà Mużikali Trinita Qaddisa fil-Festa tat-Trinità tal-Marsa. Biex nilħaq l-għanijiet ta’ dan l-istħarriġ kelli nirrakkonta l-istorja ta’ dan il-każin, u anke l-għajdut tal-partitarji u tal-Marsin, peress li l-biċċa kbira tal-lirika li tinkiteb għall-marċi brijużi tirrifletti sitwazzjonijiet li jinqalgħu matul is-snin. 1.3. Sorsi Analizzati : Biex ikolli kemm jista’ jkun informazzjoni rigward l-istorja tal-Każin tal-Banda, kif ukoll għall-isfond tal-marċi brijużi, kelli bżonn varjetà ta’ sorsi primarji u oħrajn sekondarji. Kien għalhekk li ħejjejt żewġ intervisti, waħda mas-Sur Kenneth Vella, ilkittieb tal-lirika tal-marċi brijużi tal-Każin tal-Banda, fejn dan infurmani b’varjetà ta’ informazzjoni kemm rigward il-marċi u l-aspetti orali li fihom, kif ukoll dwar aspetti storiċi. Intervistajt ukoll lis-Sur Sandro Spiteri, membru fil-Kumitat Ċentrali tal-Każin li, apparti li għarrafni b’diversi fatturi orali fuq il-marċi, tani informazzjoni dwar ilMaġġur Anthony Aquilina, surmast tal-marċi li ħassejt li kien ta’ importanza kbira għall-Każin. Mill-banda l-oħra, il-ktieb tal-festa maħruġ mill-Każin fl-1999 għall-għeluq il-50 sena tal-Banda Trinità, li sellifni s-Sur Victor Cilia, eks segretarju u president talistess għaqda, ukoll serva bħala sors primarju, b’mod speċjali għar-riċerka storika dwar il-Każin u dwar l-ewwel surmast tal-Banda Trinità. Sorsi oħra sekondarji, bħallktieb Oral Literature in Africa ta’ Ruth Fennigan kien utli fl-għarfien tal-aspetti performattivi li jidhru fil-marċi brijużi. 1.4. It-Tqassim tat-Teżi Il-kitba ta’ din it-teżi hija maqsuma f’sitt kapitli. L-ewwel kapitlu huwa lintroduzzjoni li jispjega l-għanijiet tar-riċerka, is-sorsi analizzati u t-tqassim ta’ dan listudju. It-tieni kapitlu jersaq lejn definizzjoni ta’ marċ brijuż, id-differenzi bejn ilmarċi li jwasslu għall-oriġini tal-marċi brijużi, u kummenti fuq aspetti varji tattradizzjoni orali fi ħdan il-marċi brijużi. Dan il-kapitlu jwassal għat-tielet kapitlu li jippreżenta l-kuntest storiku tal-Każin tal-Banda u ta’ żewġ personaġġi prominenti filKażin. Ir-raba’ kapitlu jispjega pass pass kif twettqet din ir-riċerka bi spjegazzjoni fuq il-ġbir tal-materjal, li jinkludi l-għodda użata għall-intervisti, u kif ġbart il-materjal. Wara l-metodoloġija, il-ħames kapitlu janalizza mill-qrib it-tekniki użati f’dawn ilmarċi, bħat-ton u l-iperbole. Dan l-aħħar kapitlu prinċipali josserva l-aspetti orali waqt il-marċi, bħaċ-ċapċip u l-kant, u anke l-ilbies tal-partitarji, fost diversi fatturi oħra li jagħmlu l-marċ brijuż. Barra minn hekk, iħares lejn id-differenzi u s-similaritajiet fil-lirika tal-marċi brijużi bejn il-Każin tal-Banda u għaqdiet oħra barra llokalità tal-Marsa. Description: B.A. (Hons)(Melit.) Sun, 01 Jan 2023 00:00:00 GMT https://www.um.edu.mt/library/oar/handle/123456789/120256 2023-01-01T00:00:00Z https://www.um.edu.mt/library/oar/handle/123456789/120255 Title: L-intensitajiet spiritwali fil-ġabra ‘Għera’ ta’ Gioele Galea Abstract: It-tema prinċipali mistħarrġa f’din it-teżina hija l-intensitajiet spiritwali fil-ġabra poetika ‘Għera’ tal-kittieb kontemporanju Gioele Galea. Kien proprju n-nuqqas ta’ riċerka attwali dwar dan il-kittieb versatili li mmotiva dan l-istudju dwar diversità ta’ modi kif il-lirika tista’ tapprofondixxi l-ansjetajiet tar-ruħ. Dan l-istudju jieħu, bħala kampjun rappreżentattiv ħafna tal-versatilità letterarja ta’ dan il-poeta u rumanzier, ġabra poetika waħda li fis-singularità tagħha taqbad ħafna perspettivi metaforiċi, allużivi, u allegoriċi tal-kunflitti spiritwali talpoeta, suġġett li għad irid jiġi investigat aktar mill-idjoma kritika Maltija. L-għan ewlieni ta’ din it-teżina kien li jiġu identifikati l-għodod liriċi li jħaddem Galea biex bihom jirrappreżenta l-qagħda spiritwalment intensa ta’ bniedem sensittiv għal kull oġġett madwaru, meqjus bħala ħjiel ta’ moviment tar-ruħ anki fil-banalità apparenti tiegħu. Dawn il-ħsus intensi f’ruħ il-poeta sikwit jiżvolġu fi djalogi mal-interlokutur divin jew enigmatiku, li jinħass aktar milli jidher b’mod espliċitu. Għalhekk, xi drabi l-kompożizzjoni tilgħab bejn il-bixra ta’ monologu u dik ta’ djalogu. Drabi oħra, il-kundizzjonijiet ambjentali ċirkostanti jirrendu simboli konkreti ta’ interjorità li fiha jaħbtu ħsibijiet kunfliġġenti fejn tidħol il-fidi f’Alla, jew aħjar, l-esperjenza reliġjuża qatt mitmuma. Għalhekk, din ir-riċerka tistaqsi kontinwament: X’inhuma l-kunflitti u d-dilemmi interjuri tal-poeta li jissarrfu f’inferenzi metaforiċi, f’kuntrasti ironiċi, u f’paralleliżmi analoġiċi fil-poeżija? Dawn it-tekniki letterarji u oħrajn x’iberrħu, u kif jagħmu dan, dwar qagħda spiritwalment inċerta daqskemm ġenwina? Il-metodoloġija ta’ din it-teżina hija msawra, essenzjalment, minn qari ta’ sorsi kritiċi fuq Gioele Galea, studji analitiċi dwar kitbiet letterarji oħra tal-istess xeħta tiegħu, u anki numru ta’ kotba u studji kritiċi rilevanti għall-analiżi tax-xbihat allużivi fil-ġabra. Il-qari talbijografija tiegħu għal influwenzi rilevanti kien l-ewwel stadju, iżda daqstant importanti u utli kien il-qari taż-żewġ rumanzi tiegħu ‘Tħabbat Xtaqtek: Djarju mill-Eremitaġġ’ (2017) u ‘In-Nar għandu Isem: Noti minn Paġna Intima’ (2020) li, fl-idjoma personali tagħhom, urew fejn id-dettalji bijografiċi intimi jintisġu ma’ mekkaniżmi, xbihat, u motifi letterarji mħaddma filproża daqskemm fil-lirika tiegħu. Id-diversi intervisti mtellgħin fuq pjattaformi soċjali, ngħidu aħna dawk tas-serje LELÀ: ‘Kliem u Noti u l-Bejniet u Wiċċ imb Wiċċ’, ukoll kienu utli għal din ir-riċerka, għaliex fihom Galea jagħti spjega tal-esperjenza tal-misteru li tiddomina t-testi kollha tiegħu. B’dan il-mod stajt napprezza kif il-kitbiet kollha tiegħu, meqjusin bħala espressjoni spiritwali bla qtugħ, isawru djarju wieħed intimu tar-ruħ. Fit-tieni kapitlu ta’ din it-teżi se tintwera b’mod analitiku l-ambigwità fil-kitbiet poetiċi ta’ Galea, stil ta’ espressjoni ħafna drabi maħluq minħabba l-eliminazzjoni ta’ dettalji tipikament inkorporati f’kitbiet poetiċi tradizzjonali. Bħal poeti oħra kontemporanji, Galea rarament jiddetermina l-indirizz poetiku b’kuntesti temporali u spazjali, teknika li permezz tagħha l-istqarrijiet poetiċi jibqgħu personali (tal-poeta biss) daqskemm isiru universali (indirizzati lil kwalunkwe qarrej). Minħabba li l-figura divina tipparteċipa ħafna fl-element ta’ vagezza tal-poeżija, il-kapitlu jiffoka wkoll fuq l-allużjonijet kultant sottili għad-divin, speċjalment meta l-preżenza tiegħu dejjem tinħass assenti. Xi sorsi supplementari li servew ta’ konsolidazzjoni għall-argument analitiku tar-riċerka kienu ‘The Pursuit of Signs’ ta’ Jonathan Culler u ‘Overheard Voices: Address and Subjectivity in Postmodern American Poetry’ ta’ Ann Keniston, studji li jixhdu kif l-indefinitezza tista’ tkun aspett poetiku li jagħni lesperjenza spiritwali. It-tielet kapitlu se jiffoka fuq analiżi tal-allegoriji, il-metafori, il-metonomiji u l-bqija tat-tekniki figurattivi mifruxa fil-poeżija ta’ Galea, li permezz tagħhom jirnexxilu jsarraf issensibilitajiet ta’ ruħu fi entitajiet konkreti li naħbtu magħhom fil-ħajja ta’ kuljum. Fi kliem ieħor, l-analiżi għandha l-iskop li tħott is-saffi ta’ emozzjonijiet u movimenti spiritwali kkondensat fi stil poetiku minimalista li jikkonċentra fuq l-oġġett ta’ kuljum. Għalhekk, l-istudju se jirreferi għal xi aspetti minn diversi movimenti u teoriji letterarji mħaddma fil-poeżiji ta’ Galea, ngħidu aħna, it-teorija tal-korrelattiv oġġettiv ta’ T.S. Eliot u b’xebh magħha, it-teknika tad-defamiljarizzazzjoni ta’ Viktor Shklovsky, li permezz tagħha se jintwera kif il-banalità tal-oġġett issir stramba u twassal għal għadd mhux mistenna ta’ konnotazzjonijiet. Ir-riċerka se tidħol ukoll f’xi aspetti mill-fenomenoloġija ta’ Maurice Merleau-Ponty li jkomplu jikkonsolidaw l-aspett tal-perċezzjoni oġġettiva fil-poeżija ta’ Galea. L-istil poetiku ta’ Galea huwa mnebbaħ minn diversi xejriet tal-moviment Imaġista (kif tixhed “Ħġieġ,” l-iqsar poeżija tal-ġabra iżda wkoll l-aktar li tibdel lill-ambjent f’esperjenza epifanika). L-argument, f’din il-parti tat-teżina, jirreferi wkoll għal aspetti fundamentali tal-Imaġiżmu u l-Vortiċiżmu, kif żviluppati mill-poeta-kritiku Ezra Pound. Fir-raba’ kapitlu, din it-teżina tevalwa l-motif predominanti tal-għera (evidenti saħansitra mit-titlu stess tal-ġabra lirika). Se tanalizza x’tip ta’ għera hi: jekk hijiex korporali, spiritwali, verbali, topografika - jew dawn kollha f’mixja lirika waħda. Fuq kollox, se tanalizza wkoll il-kawżi ta’ din il-qagħda ta’ għera dominanti fil-poeżiji ta’ din il-ġabra. Għal din il-parti, l-istudju se jiġi kkonsolidat minn diversi testi reliġjużi, fosthom il-konfessjonijiet ta’ Santu Wistin u l-kitbiet ta’ San Ġwann tas-Salib. Barra minn hekk, l-argument analitiku jirrikorri wkoll għat-teżi ta’ Pierina Mercieca, xi studji kritiċi ta’ Andrew Sciberras dwar Galea, u anki xi aspetti filosofiċi ta’ Ludwig Wittgenstein, Emmanuel Levinas, u Martin Heidegger. B’dawn il-perspettivi kritiċi, dejjem magħżulin f’korrispondenza max-xejriet poetiċi ta’ Galea, il-qarrejja għandhom jagħrfu aħjar id-dinamika kunfliġġenti tas-sensibilità lirika ta’ dan il-poeta, li sikwit irreġistra l-movimenti interjuri ta’ ruħu f’poeżija konċiża iżda mimlija teknika li tipproblematizza l-esperjenza reliġjuża. Description: B.A. (Hons)(Melit.) Sun, 01 Jan 2023 00:00:00 GMT https://www.um.edu.mt/library/oar/handle/123456789/120255 2023-01-01T00:00:00Z https://www.um.edu.mt/library/oar/handle/123456789/120253 Title: L-innijiet tal-għaqdiet Maltin : ġabra u analiżi Abstract: Din it-teżina ser titratta l-qasam tal-innijiet tal-għaqdiet Maltin u Għawdxin għaliex dan huwa qasam tat-tradizzjoni orali li ftit ġie trattat f’testi akkademiċi. Minħabba f’hekk, xtaqt li nimla l-vojt permezz ta’ riċerka estensiva f’dan il-qasam. Xtaqt li nistudja dawn l-innijiet għaliex huma tradizzjoni li għandha għeruq sodi fl-istorja ta’ pajjiżna u jkun ta’ għajb kbir kieku jintilfu darba għal dejjem, kif qed jiġrilhom ħafna innijiet u elementi tat-tradizzjoni orali oħra. Barra minn hekk, jiena membru ta’ banda fil-Mosta u b’hekk għandi ċertu qrubija għal dan il-qasam. Minkejja dan, fl-għaqda partikolari li nappartjeni magħha jien l-innu jindaqq biss filwaqt li aktar ma jmur iż-żmien, il-lirika qed tintesa għaliex ma titkanta qatt għajr għal f’xi okkażjoni speċjali. Dawn l-innijiet huma differenti minn tipi oħra ta’ mużika vokaliċi għaliex minbarra li jħallu impatt fuq il-membri tal-għaqda nfushom, jħallu impatt wkoll fuq is-semmiegħa kollha tiegħu permezz ta’ fenomeni differenti. F’din it-teżina ffukajt fuq: • Id-definizzjoni u l-etimoloġija tal-idea u tal-kelma Innu, kemm fil-Malti kif ukoll fit-Taljan u fl-Ingliż • L-isfond storiku li fih bdew jinbtu dawn l-għaqdiet diversi kif ukoll l-isfond storiku li fih inkibbu diversi innijiet ta’ dan il-qasam. • It-temi komuni li nsibu fil-ġeneri kollha bħalma huma t-tifħir lejn entità jew persuna • It-temi distinti tal-ġeneri differenti b’eżempji minn numru żgħir ta’ innijiet rapreżentattivi li għażilt mill-ġabra tiegħi. • It-tekniċi figurattivi li huma tipiċi f’dawn l-innijiet Minħabba l-fatt li f’Malta għandna ammont sostanzjali ta’ għaqdiet li jħaddnu innu speċifiku, kien hemm bżonn li jintgħażlu ċertu ġeneri li trattajt f’din it-teżina. Dawn huma l-innijiet tal-baned, innijiet iddedikati lill-qaddisin patruni, jew l-innu popolari, linnijiet tal-iskejjel, l-innijiet politiċi, l-innijiet nazzjonali u l-innijiet sportivi. Dawn il-ġeneri mhumiex il-ġeneri kollha ta’ innijiet li nsibu fil-Gżejjer Maltin iżda għażilt li nitratta dawn għaliex filwaqt li għandna numru sostanzjali minnhom, huma distinti minn xulxin biżżejjed li jidhru b’mod ċar id-differenzi fil-lirika, fit-temi u fl-istil tagħhom. Apparti dawn l-innijiet li trattajt jien f’din it-teżina, insibu wkoll numru ta’ innijiet li jintużaw f’diversi movimenti u promozzjonijiet, kif ukoll innijiet fil-qasam reliġjuż. Wara ġabra estensiva ta’ madwar 120 innu, għażilt li niffoka fuq dawn l-oqsma u għażilt xi innijiet li għandhom il-karatteristiċi tipiċi biex ikunu rappreżentazzjoni talġeneru tagħhom. F’Malta, l-għaqdiet saru parti mill-ħajja ta’ diversi persuni għaliex f’diversi lokalitajiet madwar il-gżejjer nsibu għadd kbir ta’ għaqdiet li jinkludu każini tal-baned, għaqdiet sportivi u parroċċi b’patruni differenti. Tradizzjonalment, dawn l-għaqdiet ikollhom kollezzjoni vasta ta’ kant u marċi iżda l-aktar li jispikka huwa l-innu trijonfali li fih iħaddan il-valuri u fehmiet li jidhru bħala prijorità għal dik l-għaqda speċifika. Dawn linnijiet jistgħu jinqasmu f’diversi ġeneri differenti li jitrattaw aspetti u temi differenti minn xulxin iżda, fil-qofol tagħhom, għandhom funzjoni waħda; li jfaħħru lil dik l-entità speċifika. Funzjonijiet oħra li jista’ ikollhom dawn l-innijiet jistgħu jvarjaw minn pika u kompetizzjoni għal talb u dan jiddependi mit-tip ta’ għaqda li huma ddedikati għalihom. Dawn l-innijiet tipikament huma magħmula minn mużika u lirika iżda llum xi wħud minnhom għadhom jindaqqu mingħajr ma jitkantaw. Dan huwa dnub kbir għaliex din il-lirika normalment tkun miktuba minn poeti kbar li jkollhom ċertu relazzjoni ma’ dik l-għaqda jew ma’ dik il-lokalità u jistgħu jitqiesu bħala patrimonju kemm ta’ dik l-għaqda speċifika, kif ukoll għal-lokalità u għan-nazzjon. Fl-istorja ta’ dawn l-innijiet, speċjalment qabel it-Tieni Gwerra Dinjija, kien hawn tradizzjoni li jinkitbu bit-Taljan u dan kien isir għaliex filwaqt li t-Taljan kien meqjus bħala l-lingwa l-għolja, il-Malti kien meqjus bħala l-lingwa l-baxxa. Aktar tard, kien hawn diversi sforzi sabiex l-innijiet li kienu diġà miktuba jinqalbu mit-Taljan għall-Malti. Dan ixxogħol kien isir minn diversi dilettanti bħalma hu Dun Frans Camilleri li kien jittraduċi ħafna innijiet reliġjużi ta’ diversi lokalitajiet. Minbarra dan, dawn l-innijiet tal-għaqdiet ivarjaw ukoll fl-istili għaliex għandna innijiet b’ton solenni u b’rittmu aktar kajman li jixbhu l-innijiet reliġjużi u għandna innijiet b’ton aktar ċelebrattiv u b’rittmu aktar mgħaġġel li jissejħu inni-marċi. L-inni-marċi huma partikolari għaliex iħalltu flimkien ċertu karatteristiċi li huma tipiċi fl-innu u karatteristiċi li huma tipiċi għal marċ. Kif żvela Mro. Manoel Pirotta fl-intervista li għamiltlu, dan isir permezz ta’ elementi ta’ marċ fil-bidu u fit-trio tiegħu filwaqt li fil-partijiet l-oħra, dan l-innu-marċ jieħu l-elementi tal-innu. Dawn l-istili differenti huma dipendenti mill-ġeneru iżda mhux għalkollox. L-innijiet sportivi jidhru b’mod esklussiv bħala inni-marċi għaliex minħabba l-ambjent li jintużaw fih, it-ton ċelebrattiv huwa essenzjali filwaqt li l-innijiet tal-iskejjel, l-innijiet politiċi u l-innijiet politiċi jidhru bħala innijiet b’ton aktar solenni u dan ukoll jiddependi mill-ambjent li fihom jintużaw. L-innijiet tal-baned u l-innijet tal-glorja (ddedikati lill-qaddisin) huma daqxejn differenti għaliex jużaw iż-żewġ stili sabiex l-innografi jgħaddu l-messaġġ mixtieq. Description: B.A. (Hons)(Melit.) Sun, 01 Jan 2023 00:00:00 GMT https://www.um.edu.mt/library/oar/handle/123456789/120253 2023-01-01T00:00:00Z