Studju u analiżi tal-kollokazzjonijiet ta' lessiku essenzjali fil-kitbiet ta' Ġorġ Preca

Abstract

L-għan ta’ dan ix-xogħol huwa li tiġi studjata għażla ta’ xogħlijiet ta’ Ġorġ Preca (1880-1962) fuq il-livell lessikali permezz tal-metodoloġija tal-lingwistika tal-korpora, sabiex jiġi identifikat lessiku essenzjali u kif jikkolloka. Fih ħarsa ġenerali lejn iż-żewġ approċċi ewlenin għall-kollokazzjoni, jiġifieri dak frażjoloġiku u dak lessikali, li jibbaża fuq il-frekwenza. Wara li jitfissru prinċipji importanti tal-lingwistika tal-korpora, jintwera kif ġew applikati fil-bini tal-Korpus Ġorġ Preca. Bl-użu tal-korpus tal-MLRS bħala referenza, tinsilet lista ta’ 500 element essenzjali, li sebgħa minnhom jiġu analizzati fid-dettall biex jinkixfu l-mudelli kollokattivi u l-għenieqed lessikali tagħhom. Ir-riżultati jiġu ppreżentati bħala parti minn stampa ikbar li tixħet dawl fuq kif ix-xogħlijiet ta’ Preca jistgħu jiġu interpretati.