Aħna ġejna mill-ġenna : l-ispiritwalità fil-ħajja u l-kitba ta’ Oliver Friggieri

Abstract

Nhar is-Sibt 5 ta’ Marzu 2022, ġewwa l-Kunvent tal-Karmelitani fl-Imdina, ittellgħet il-Konferenza “Aħna Ġejna mill-Ġenna: L-Ispiritwalità fil-Ħajja u l-Kitba ta’ Oliver Friggieri” fl-okkażjoni tal-anniversarju tat-twelid tal-mibki Prof. Friggieri. Il-Konferenza kienet organizzata mill-Istitut Karmelitan, l-Akkademja tal-Malti, u d-Dipartiment tal-Malti fl-Università. Seba’ kelliema esploraw aspetti differenti tal-ispiritwalità ta’ Friggieri, kollha kemm huma bit-tir li joħorġu d-dimensjoni fundamentali tal-ħarsa kontemplattiva ta’ Friggieri fuq il-madwar. Mill-ħarsa lejn il-fraġilità tiegħu nnifsu u d-dissens lejn is-soċjetà Maltija hija u tinbidel radikalment maż-żmien, għall-ħarsa lejn it-tiġrib li jġibu l-istituzzjonijiet soċjali, għall-ħarsa lejn l-integrità tal-ħolqien u l-kundizzjoni ħlejqija, għall-ħarsa lejn il-logħba qawwija bejn il-fidi u l-politika, Kristu u l-Knisja, għall-ħarsa lejn ir-reliġjon bħala sies u għajn ta’ għaqda ta’ ġens, għall-ħarsa lejn it-taqbida bejn il-moħħ u l-qalb fil-materja tal-fidi u t-tbatija fejjieda tas-salib, għall-ħarsa, fl-aħħar nett, lejn il-kategoriji eżistenzjali tal-imħabba, il-mewt, u Alla; dawn kienu biss ftit mill-aspetti li l-Konferenza ddiskutiet.