Fantasia melodica ‘Cuor d’Artista’ : Mro. Willie Attard (1899-1970)

Abstract

Is-sena l-oħra kelli x-xorti li nitkellem fid-dettal fuq xogħol ieħor bikri minn tas-Surmast Willie Attard – Un Saluto a Malta (1933). Dan l-artiklu, li kien deher fil-ħarġa tal-programm tas-sena l-oħra fl-okkażjoni tal-Festa Marija Bambina 2015 (p. 159-163), kont ktibtu b’tifkira ta’ għeluq il-45 sena mill-mewt ta’ dan is-Surmast tant maħbub. Dan l-artiklu jidher li ntlaqa’ tajjeb ħafna mill-qarrejja tant li, erġajt tħajjart nikteb wieħed fuq xi xogħol ieħor mill-pinna tiegħu. Infatti, għal dis-sena għażilt il-Fantasia Melodica ‘Cuor d’Artista’ illi hu kiteb fl-1928 meta kien għadu kemm laħaq Surmast-direttur tal-Banda Ġużeppina Ħamruniża, proprju fid-9 ta’ Ottubru tal-istess sena. Nieħu din l-okkażjoni biex għal darb’ oħra, niżżi ħajr lis-Sur Joe Cauchi, Segretarju Ġenerali tas-Società Filarmonica ‘La Vittoria’ A.D. 1907 tal-Mellieħa talli għoġbu jgħaddili l-mużika tagħha biex stajt ninseġ dan l-artiklu