L-innijiet ta’ Mro. Angelo Pullicino (1904-79) : innu-marc banda San Giljan

Abstract

L-Innu-marċ Banda San Ġiljan ma jafx meta twieled. Skond artiklu ‘Banda San Ġiljan – Storja ta’ 75 sena: 1927-2002’ li kien deher fil-ħarġa tal-Programm tal-Festa 2002 għall-okkażjoni tal-75 sena mit-twaqqif tal-Banda San Ġiljan, insibu li fl-ewwel nofs tat-tletinijiet il-Banda kienet għaddejja minn żmien tad-deheb u kien hawn li Anġlu Pullicino kkompona l-Innu tal-Banda San Ġiljan. Iżda, bħalma ġara fil-każ tal-Innu Popolari, lanqas hawn ma tingħata data fissa ta’ meta nkiteb. Li huwa żgur imma, li l-Innu-marċ Banda San Ġiljan ġie wara l-Innu Popolari San Ġiljan, u dan jikkonfermahulna Spiru Tanti stess f’intervista li kienet saritlu minn Andrew Borg fl-ewwel ta’ Mejju 1990 meta qal: ‘… Dak iż-żmien kellna innu ieħor flok dak li nkantaw ilum, kien in-Nomine Insignie. Tal-lum, ‘Lil Ġiljan bniedem tas-sema …’ kitbu Silvio Frendo, li kien mar għamd is-Surmast Pullicino għall-mużika. Imbagħad Karmenu Galea SDB kien kitbilna wkoll ‘Fi Ġnien Sabiħ u Ċkejken …’ li kienet iddoqq il-Banda.’