Il-familja Grech ‘Tal-Mugrin’

Abstract

Meta ssemmi il-familja Grech ‘Tal-Mugrin’ ġewwa San Ġiljan kulħadd jgħidlek li xi darba jew oħra sema’ biha. Dil-familja numeruża kienet toqgħod fi Triq Sant’ Anġlu u niesha kienu sidien tal-kalkara tal-ġir li kien hemm fuq Wied Għomor ‘il ġewwa nett. Għal snin sħaħ kienet tfornu ‘l Malta kollha bil-kwalità tajba tal-materjal li kienet tipproduċu. Ġara iżda, li fit-80ijiet il-kalkara ntfiet għal dejjem, (a) minħabba li l-iżvilupp tal-bini f’dawk l-inħawi kien qabad f’daqqa u sewwa u d-dħaħen bdew idejqu lill-ġirien, u (b) għax imbagħad ġiet li kull wieħed mill-aħwa li joħroġ bil-pensjoni ma jiġġeddidlux il-permess, imma jaqa’ biss fuq il-bqija tal-aħwa sakemm jispiċċaw l-aħwa kollha wieħed wara l-ieħor.