Il-parlament Malti : kif beda, x'inhu u x'jaghmel

Abstract

L-istudju ta kif jaħdem il-Parlament Malti huwa dirett lejn li jkabbar l-apprezzament tad-demokrazija parlamentari tagħna li hija fil-qalba tal-liberta u d-drittijiet tagħna bħala poplu u bħala ċittadini ta' Malta. Huwa pjaċir tiegħi li nara dan il-proġett li huwa tant għal qalbi jsir realta. F'għeluq id-90 sena mill-Parlament ta' Malta tal-1921 din il-pubblikazzjoni tagħti bidu għal tagħlim aktar dettaljat dwar il-Parlament ta' Malta bħala istituzzjoni distinta u separata mill-Gvern tal-ġurnata, u bħala dik l-istituzzjoni li fiha huma rappreżentati l-forzi politiċi kollha eletti mill-poplu f'elezzjonijiet ġenerali ħielsa u demokratiċi. Niftakru li f'elezzjoni ġenerali nissejħu lkoll biex neleġġu Parlament ġdid li minnu jiġi ffurmat Gvern immexxi minn Prim Ministru bħala dik il-persuna li jkollha l-appoġġ ta maġġoranza tad-deputati eletti mill-poplu. It-tisħiħ tal-istituzzjoni parlamentari jibda millapprezzament tal-importanza tagħha . Dan l-apprezzament ma jistax jibda jkun iffurmat jekk ma jkunx hemm ilkonoxxenza ta x'inhu u x'jagħmel il-Parlament u fejn huwa postu fil-bilanċ tal-poter kif imfassal mill-Kostituzzjoni. Dan l-ktieb ta' ħidma (workbook) dwar il-Parlament huwa studju dwar il-libertajiet u d-drittijiet tiegħek bħala ċittadin Malti jew Maltija. Għożżu bħalma tgħożż u tħares dejjem id-demokrazija u l-liberta; li ntrebħu b'tant sagrifiċċju u li jridu jkomplu jintrebħu kuljum bil-viġilanza ta' kull Malti u Maltija.