Il-banda Ottomana f’Bormla fi zmien l-assedju l-kbir

Abstract

Il-Belt ta’ Bormla mhix assoċjata wisq mal-Assedju l-Kbir minħabba li l-istorja dejjem inkitbet mir-rebbieħa jew minn dawk li jaħsbu li rebħu l-gwerra. Iżda Bormla kienet waħda mill-postijiet kruċjali f’dan l-assedju. Bħall-Għolja Xiberras, l-inħawi ta’ Bormla ttieħdu mill-armata Ottomana. L-aqwa ġenerali tal-Ottomani kellhom it-tined u dderiġew l-attakki minn fuq l-Għolja ta’ Santa Margerita kontra l-Birgu u Forti San Mikiel. It-Torok indunaw bil-valur strateġiku ta’ dan il-post medjevali. F’Bormla qegħdu numru ta’ kampijiet militari u fiha għamlu x’uħud mill-aħjar artillerija li kellhom. Saħansitra għamlu mappa ta’ Bormla, li riċentament kienet ippubblikata minn Albert Ganado fil-ktieb tiegħu ta’ Mapep tal-Assedju l-Kbir. Din il-mappa hija waħda mill-aktar mappi importanti li qatt instabu sa issa dwar l-Assedju l-Kbir.