Inbid qadim fi fliexken godda : il-partiti politici u l-ghoti ta gvern responsabbli

Abstract

'L-ordni l-qadim ta' l-affarijiet qed jitmermer u minfloku qed jifforma ordni ġdid li m 'hux, bħal ta' qabel, mibni fuq il-fdal talqadim, imma fuq sisien għal kollox ġodda'; hekk ġabet il-Voce dei Popolo fl-1919, meta kienet qed tikkummenta fuq rappreżentazzjoni ħerqana tar-Romanticismo ta' Girolamo Royetta li kienet ittellgħet fit-Teatru Manoel: dik 'il-wirja mill-aqwa ta' patrijottiżmu li laħqet il-qofol tagħha fix-xena tal-ħalfa ta' Mazzini u meta Vitaliano Lamberti jgħajjat "Issa l-waqt!'" Il-laqgħat iffullati ta' l-Assemblea Nazionale kienu rappreżentattivi u simboliċi daqs iż-żigarelli bojod u ħomor li libsu n-nies fuq sidirhom. Is-sala tal-Giovine Malta kienet mimlija b 'nies ġejjin 'minn kull klassi soċjali, nies bla partit politiku li madankollu għandhom twemmin wieħed, in-Nazzjonaliżmu'. Ferħan se jtir bid-dimostrazzjoni li għamlulu quddiem daru biex jiċċelebraw il-kisba ta' Gvern Responsabbli, Sceberras qal lill-folla li kien wasal il-waqt li l-partiti jwarrbu d-differenzi politiċi kollha ta' bejniethom, u jaħdmu għalenija biex iħaddmu l-Kostituzzjoni l-ġdida fi spirtu ta' lealta'.

Din l-ewforja kienet katarsi, tisfija ta' l-imgħoddi mill-ħażen kollu tiegħu, u, għal mument, l-antiċipazzjoni ta' dinja mibdula wara snin sħaħ ta' mistennija w tbatija, ħolma qasira għaliex il-kunflitt huwa endemiku fis-soċjeta u għax is-soluzzjoni kienet tinsab sewwasew filli jitrawmu l-partiti politiċi bħala mekkaniżmu razzjonali li bih il-fehmiet differenti jitqiegħdu f'ċerta ordni u jitqabblu ma' xulxin fi ħdan l-ordni kostituzzjonali li, mibdul mill-qiegħ, kien appik se jibda jitħaddem.