Il-Perit Duminku Mintoff u l-Immakulata (1916-2012)

Abstract

Duminku Mintoff twieled Bormla nhar is-6 ta’ Awwissu 1916 u ġie mgħammed l-għada ġewwa s-Santwarju tal-Immakulata. Għammdu l-Viċi Parroku Borg u ġie mogħti l-ismijiet ta’ Duminku, Konċettu, Giovanni u Ġużeppi. Il-parrinijiet kienu n-nanniet materni tiegħu, iġifieri Giovanni Maria Farrugia u l-mara tiegħu Marianna. L-att jgħarrafna li kien bin Frederiku Mintoff li kien jiġi t-tifel ta’ Danjeli. Ommu kienet Konċetta Farrugia, bint Giovanni Maria. L-att tal-magħmudija jiddeskrivi lil parrinijiet bħala “de hac civitate” iġifieri li t-tnejn kienu minn Bormla. Biss kif spjegali ħu Duminku, Patri Dijonisju, in-nanniet materni ma kinux it-tnejn minn Bormla. Fil-verità nanntu Marianna, imwielda Burlò, kienet mill-Isla. Iżda għall-Viċi Kurat ta’ dak iż-żmien, kull min ġustament kien imur jgħix f’Bormla kien iqisu bħala Bormliż jew Bormliża. Interessanti l-fatt li t-tifel ta’ ħu Marianna, iġifieri Manweli, ma kien ħadd għajr il-futur arċipriet tal-Isla, Dun Ġwann Carlo Burlò.