L-innu solenni fix-xogħolijiet ta' Mro. Antonio Miruzzi (1867-1944)

Abstract

Twieled il-Furjana fl-10 ta’ Ottubru 1867, bin Ġużeppi Miruzzi u Mikelina, imwielda Brincat. Ta’ sitt snin tilef lill-ġenituri tiegħu u ddaħħal f’dejr it-tfal iltiema tal-Belt Valletta. Ta’ sbatax-il sena mar jistudja l-mużika f’konservatorju ġewwa l-Italja. Wara li spiċċa mill-istudji tiegħu xtaq jimxi fuq il-passi ta’ zijuh Paolo u jimbarka fuq bastiment navali bħala mużikant bil-għan li eventwalment jilħaq bandmaster. Dan il-ħsieb tieħu iżda ma rnexxiex. Minflok, tela’ Tuneż flimkien ma’ martu Konċetta u hemmhekk waqqaf banda Maltija. Wara sitt snin reġa’ niżel lura lejn art twelidu u ddeċieda li jibni karriera mużikali fi ħdan il-baned Maltin u Għawdxin. Dan hu Mro. Antonio Miruzzi, għalliem, direttur u kompożitur ta’ għexieren kbar ta’ kompożizzjonijiet. U fost dawn ix-xogħlijiet, l-aktar li jispikkaw huma, bla dubju ta’ xejn, l-innijiet solenni li dwarhom sejrin nitkellmu f’dan l-artiklu.