Fuq il-passi ta' Miruzzi

Abstract

Fil-ktieb tal-festa tas-sena li għaddiet kont laqqajtkom mas-Surmast Antonio Miruzzi li mexxa lis-Soċjetà Filarmonika ‘Nicolò Isouard’ bejn l-1894 u l-1909. Dan għamiltu fl-okkażjoni tal-150 anniversarju mit-twelid tiegħu. Is-sena d-dieħla wkoll l-istess surmast ser jagħlaq 75 sena minn mewtu. Għaldaqstant inħoss li għandi nibqa’ nżommkom aġġornati dwar ħajjet u ħidmet das-surmast li jiena sejjaħtlu ‘r-re tal-baned Maltin fl-ewwel tliet deċennji tas-seklu għoxrin’. B’dal-iskop f’rasi xtaqt nikteb artiklu li fih inġib biżżejjed prova li biha nkun nista’ mmeri d-data tat-twelid tiegħu li s’issa dejjem emminna li kienet il-waħda t-tajba. Minn hawn nixtieq nirringrazzja lil Mons. Richard Borg B.A., Lic.D., Naxxari bħali, tal-informazzjoni li għoġbu jgħaddili wara riċerka li għamel fir-reġistru parrokkjali tal-Furjana fejn kien Arċipriet.