Luċjan Pullicino - il-bniedem ta' kull stagun

Abstract

Fl-artiklu ta’ dis-sena ser nitkellmu fuq xi delizzji u sport li kien iħobb jipprattika Luċjan fil-ħin liberu tiegħu. Kif jaf kulħadd, il-kaċċa minn dejjem kienet ħafna għall-qalb il-Ġiljaniżi. Dan għaliex, sa minn żmien il-Kavallieri tal-Ordni, San Ġiljan kellu firxa kbira ta’ raba’ u xagħri, miżgħud b’kull kwalità ta’ siġar li qatt tista’ timmaġina. Fihom kienu jistrieħu l-għasafar waqt li jpassu għatxana u għajjiena mejta minn fuq il-gżejjer Maltin. Tista’ tgħid li, f’kull dar Ġiljaniża kont issib xi senter. Fost dat-talin insibu lil Salvu Cefai li għal ħafna żmien kien is-sagristan tal-knisja l-qadima fi żmien il-kappillani Bonanno, Debono u Grech. Kien hemm saħasitra qassisin li servew bħala kappillani fil-parroċċa li kienu wkoll kaċċaturi akkaniti, fosthom Dun Guido Calleja u Dun Ġwann Galea, li inċidentalment, it-tnejn huma wkoll kompożituri ta’ mużika sagra. Ukoll, fi żmien il-parrokat ta’ Dun Tony Agius daħlet il-famuża sparatura in bianco minn fuq il-bejt tal-knisja waqt l-ħruġ tal-vara nhar il-festa. Das-salut bl-iskrataċ mimlijin biss biż-żigarelli bl-ilwien Ġiljaniżi joħloq effett tassew sabiħ, u li hu wieħed mill-attrazzjonijiet ewlenin f’dil-festa.