Id-devoluzzjoni tal-poter : bejn ħolma u realtà

Abstract

F’ħafna diskorsi politiċi, il-kunċett ta’ diċentralizzazzjoni jfeġġ pjuttost b’mod frekwenti. Ħafna drabi dan il-kunċett ikun mwaħħad mal-prinċipji bażillari tad-demokrazija. Imma kif jispjega Hutchcroft il-mistoqsija ta’ kull min jaħdem f’dan il-qasam - tal-akkademiċi li jirriċerkaw ilgvernijiet lokali, kif ukoll taċ-ċittadini komuni- hija jekk wara kollox dan il-ħsieb hux biss l-‘aħħar moda’ jew ‘moda ta’ żminijietna’. Fil-fatt numru ta’ mistoqsijiet joħorgu b’mod naturali meta nanalizzaw suġġett bħal dan. Id-devoluzzjoni tal-poter, li huwa fus ewlieni għal soċjetà ħafna aktar b’saħħitha demokratikament, seħħ fil-prattika jew inkella għall-kuntrarju baqa’ biss ħsieb sabiħ fuq il-karta? X’direzzjoni qegħdin nieħdu: dik ta’ aktar diċentralizzazzjoni jew ta’ iżjed tisħiħ tal-Gvern Ċentrali? X’kienet l-esperjenza tal-Kunsilli Lokali f’dawn l-aħħar tmintax –il sena jiġifieri mittwaqqif tagħhom? Kienet esperjenza ta’ suċċess jew jeżistu limitazzjonijiet? X’sitwazzjoni qegħdin fiha: dik ta’ Gvern Lokali jew Kunsilli Lokali?