Analiżi kritika ta’ Ġensna fid-dawl tal-isfond storiko-kulturali u letterarju

Abstract

Ir-rock opera Ġensna, mtella’ l-ewwel darba għall-pubbliku fl-1982, tista' tiġi mistħarrġa bħala tentattiv lejn espressjoni nazzjonal-popolari maħluqa fi żmien politiku partikolari u b'għanijiet ideoloġiċi definiti. Dan l-istudju għandu l-għan li jitraċċa t- tradizzjoni u l-influwenzi letterarji u teatrali/drammatiċi, sew Maltin sew barranin, li wasslu biex l-espressjoni nazzjonalistika u anti-kolonjali tieħu sura ġdida - f'Malta ġdida Repubblika u post-Indipendenti/Ħielsa - li madankollu ssir x'aktarx wisq aktar politiċizzata. Ġensna tiġi analizzata mill-aspett letterarju u ideoloġiku, u essenzjalment bħala diskors kulturali b'relazzjonijiet kritiċi mas-soċjetà Maltija, f'diversi oqsma fosthom fejn jidħlu kunċetti ta' identità, klassi u gost. Permezz ta’ dan l-istudju ser ikun jista’ jiġi definit x’setgħet fissret Ġensna fi żmienha, x' valur kanoniku jaf għandha bħalissa u x’tifsiriet għad ikollha tfisser għall-poplu Malti aktar ‘il quddiem.