Il-kurunella tal-Madonna tal-Patroċinju taġħlaq il-mija - issir ċentinarja

Abstract

Fl-2003 jaħbat l-ewwel ċentinarju mit-tberik u t-tqegħid ta' l-ewwel ġebla tal-knisja l-ġdida, illum dik parrokkjali. Imma matul l-2003 jaħbat ċentinarju ieħor li mhux ta' min iħallih għaddej mar-riħ. M'huwiex xi ċentinarju tal-kalibru ta' dak li ġa semmejna, imma daqstant ieħor huwa nostalġiku u għażiż, speċjalment għan-nies tal-Għasri . Ir-riferenza hija għall-kurunella tal-Madonna tal-Patroċinju miktuba b'tant sengħa mill-Kan. Lett. Dun Alfonz Marija Hili (1865-1943), u ppubblikata għall-ewwel darba fl-1903 - mitt sena ilu. Min qatt fl-Għasri ma sema' jżarżru f'widnejh dawn il-versi immortali li ħarġu mill-pinna ta' Dun Alfonz Marija Hili. Huma versi penetranti daqskemm armonjużi; sentimenti sbieħ, ħsibijiet tassew għolja u oriġinali għall-aħħar. Huwa lament ta' iben, karba għall-patroċinju ta' Ommna Smewwija. Hija talba ħerqana ħierġa tfawwar minn qalb muġugħa bl-imrar tal-ħajja; hija mhux biss talba sentimentali u appellanti, imma wkoll li tkebbes it-tama u ttaffi d-dieqa ta' qlub imjassra.