Ġrajja ta' 75 sena ilu : It-terremoti ta' nofs Jannar, 1923

Abstract

Tal-biża! Terremot... kelma li tkexkex. Fost id-diżastri goffi kollha li taf toffri n-natura, it-terremot huwa x'aktarx l-agħar wieħed fosthom għax jiġi fuqek bħall-ħalliel, bla ebda avviż ta' xejn. In-nar tarah, ixxomm id-duħħan u tisma' t-tfernieq tiegħu; l-għarrar ma jaqax f'daqqa, l-ilma li jżid ma kulma jmur huwa xorta ta' avviż u bi ftit jew wisq fortuna tista' b'xi mod taħrabhom! Imma t-terremot? Biżżejjed ngħidu li terremot wieħed li għamel f'Tangshan, iċ-Ċina, fl-1976, kien il-kaġun li dikment bagħat id-dinja l-oħra, quddiem Alla, xejn anqas minn 650,000 ruħ. Daqstant hux fenominu tal-biża t-terremot! Għandhomx tabilħaqq raġun il-popli - l-aktar dawk mġarrba - jitkexkxu quddiem biss it-tlissina ta' dan il-flaġell! Xjenzati ġeoloġisti f'dawn l-aħħar għoxrin, tletin, sena sabu teorija ġeoloġika msejħa 'Plate tectonics'. Din toffri spjegazzjoni fiċ-ċaqlieq tal-kontinenti (continental drift), fil-formazzjoni tal-muntanji u vulkani. Nistgħu ngħidu għalhekk li sa fl-aħħar iċċarat ferm u sew it-teorija ta' dak li jista' u qiegħed jikkaġuna terremoti jew aħjar theżżiż fl-art. Dawn ix-xjenzati jpoġġu lil Malta kważi eżatt fuq il-linja ta' bejn l-'Eurasian Plate' u l-'African Plate' - tnejn minn xi tnax-il plate li minnhom hija komposta l-qoxra tad-dinja li ngħixu fuqha.