Storja tal-Frangiskani fl-Art Imqaddsa : l-ewwel kunvent tal-Frangiskani f'Gerusalemm

Abstract

Il-preżenza tal-Franġiskani fl-Art Imqaddsa tmur lura 8 sekli. Fl-24 ta’ Ġunju 1219 San Franġisk t’Assisi salpa minn port fuq l-Adrijatiku, x’aktarx Bari jew Brindisi, bl-iskop li jmur jevanġelizza l-Orjent. Kien iż-żmien tal-ħames Kruċjata, li kienet ġiet imnehdija mill-Papa Innoċenz III waqt ir-IV Konċilju tal-Lateran fl-1215. Il-Kruċjata, li kienet immexxija mir-Re ta’ Ġerusalemm Jean de Brienne, u mill-Kardinal Legat Alvaro Pelagio, kienet qed tassedja l-belt ta’ Damiata (Damietta) fid-delta tax-xmara Nil fl-Eġittu, bl-iskop li mbagħad tattakka l-belt tal-Kajr u hekk ikollha miftuħa t-triq biex tidħol fl-Art Imqaddsa. Dak iż-żmien l-Art Imqaddsa kienet taqa’ taħt il-ħakma tas-Sultan tal-Eġittu, al-Malik al-Kamil, neputi tal-famuż gwerrier Saladin. Fit-2 ta’ Ottubru 1187 il-belt ta’ Ġerusalemm kienet intrebħet lura mill-Kruċjati minn Saladin, wara li ftit xhur qabel, fl-4 ta’ Lulju 1187 dan kien kisser il-qawwa tal-Kruċjati fil-battalja tal-għolja ta’ Qarne Hattin fuq l-Għadira tal-Galilija. Il-Kruċjati kienu daħlu Ġerusalemm fil-15 ta’ Lulju 1099 u waqqfu r-Renju Latin ta’ Ġerusalemm. Wara t-telfa tal-1187 il-Kruċjati irtiraw fil-belt fortifikata u port ta’ Akri (Saint Jean d’Acre) fuq il-kosta tal-Mediterran tal- Palestina, fejn damu sat-18 ta’ Mejju 1291.