It-Teatru f'San Giljan : it-tielet parti

Abstract

F’dal-artiklu, it-tielet wieħed mis-sensiela ta’ kitbiet dedikati ’l-memorja ta’ Luċjan Pullicino, se inlaqqagħkom ma’ xi xogħlijiet oriġinali mill-pinna tiegħu, fosthom id-dramm reliġjuż, Il-Leġġenda ta’ San Ġiljan (1959). Dan kien sar fit-Teatru Melita bil-kumpanija tiegħu stess. Id-dramm l-ieħor tiegħu, San Ġiljan (1954), kien ittella’ fl-istess teatru, saħansitra xxandar fuq ir-Rediffusion. U peress li kien Ġiljaniż minn Birkirkara ma setax jonqos li ma jtellax xogħol fuq il-ħajja qaddisa ta’ Santa Liena permezz tad-dramm kolossali f’sitt atti, It-trijonf ta’ Costantinu jew il-Qawwa tas-Salib (1958). Tiegħu għandna wkoll id-dramm oriġinali, Raġġi fil-Messiku (1954) minħabba li għal snin twal kien involut fil-ġbir tal-flus għall-Missjoni. Luċjan kien jidderieġi xogħlijiet t’awturi oħrajn, fosthom ta’ Dun Anton Xiberras (1921-2006) u Lino Grech (1930-2013). Fl-istess artiklu ssibu xi tagħrif addizzjonali dwar il-kumpanija Bonitas ta’ Dun Karm Calleja li dwarha ġa tkellimna fl-annwal tal-Knisja ta’ Lapsi tas-sena li għaddiet (pp. 162-176).