Ftit mill-istorja tal-każin : is-Sur Odilone Caruana - fundatur tal-Banda Marija Annunzjata

Abstract

Kienet is-sena 1862, propju 140 sena ilu, meta grupp ta' rġiel minn Ħal Tarxien, iltaqgħu u ftehmu li jkellmu lis-sur Odilone Caruana dwar twaqqif ta' Banda għar-raħal tagħna. Is-sur Odilone Caruana, iben il-Prokuratur Legali Angelo u Katerina mwielda Zammit, twieled Ħaż-Żabbar, nhar is-26 ta' Settembru 1839. Huwa żżewweġ lil Judith Trapani u kien joqgħod f'dar kbira wara l-knisja parrokkjali ta' Ħal Tarxien ; (Illum Nru. 4, Triq Brittanika.) Odilone kien bniedem sinjur u minbarra li kien iħobb il-knisja, huwa kellu ġibda kbira lejn l-arti, pittura u mużika. U għal din ir-raġuni, huwa stinka u ħabrek biex f' Ħal Tarxien twaqqfet il-banda. Billi kif diġa għedna, Odilone kien bniedem għani, kien huwa stess li minn butu qabad u xtara l-istrumenti mużikali u ġabar l-irġiel biex jibdew jitgħallmu l-mużika. Kien verament benefattur kbir tar-Raħal tagħna.