Is-Siġġiewi u l-madwar

Abstract

Meta wieħed iħares lejn il-wirt storiku tar-raħal tas-Siġġiewi l-ħsieb tiegħu imur lura lejn dawk iż-żminijiet meta fir-raħal kien hemm biss ftit abitanti li kienu jaqilgħu l-għixien tagħhom mir-raba' tal-madwar u sajjieda li kienu joħorġu bid-dgħajjes tagħhom mill-inħawi ta' Għar Lapsi. Matul is-snin tal-istorja tar-raħal dawn in-nies ħasbu biex jibnu numru ta' djar sbieħ li ħafna minnhom illum qegħdin jiġu mfittxija minn nies li qegħdin jiġu jgħixu fir-raħal. Bnew ukoll bl-għaraq ta' ġbinhom u bl-għajnuna ta' benefatturi oħrajn kappelli żgħar fil-limiti tar-raħal kif ukoll tempju sabiħ iddedikat lill-qaddis patrun tar-raħal San Nikola li jiddomina l-pjazza enormi li huwa magħruf għaliha dan ir-raħal.