Il-gżejjer Maltin joħolmu fil-leġġendi... : proposta pedagoġika għat-tisħiħ tal-esperjenza letterarja

Abstract

Fid-dissertazzjoni stħarriġt kif il-ġeneru tal-leġġendi Maltin jista’ jintuża b’effettività fit-tagħlim tal-Esperjenza Letterarja ma’ studenti tal-iskejjel sekondarji. L-ewwel tajt ħarsa kritika msejsa l-aktar fuq il-prinċipji tal-Istrutturaliżmu lejn dan il-ġeneru. Din l-analiżi għenitni nfassal skema tal-proġett li minnu, aktar tard, tfasslu għadd ta’ pjanijiet tal-lezzjoni innovattivi u riżorsi kreattivi għal magħhom. L-għan wara dan il-pakkett kien li nikxef il-potenzjal pedagoġiku ta’ dan il-ġeneru li ftit li xejn, fil-preżent, qed jingħata importanza. Fl-aħħar, b’risq l-evalwazzjoni ta’ din il-proposta pedagoġika, uħud minn dawn il-lezzjonijiet twettqu f’xi klassijiet tat-tielet sena sekondarja u mogħtija lil xi għalliema tal-Malti. Mill-evalwazzjoni skoprejt kemm intlaqgħet tajjeb din l-idea mill-istudenti u mill-għalliema, u li t-tnejn jemmnu li l-leġġendi Maltin għandhom potenzjal qawwi u sod fil-klassi tal-Esperjenza Letterarja.