Id-djalett Malti tas-Siġġiwin

Abstract

Huwa magħruf sew li f'kull pajjiż l-abitanti, barra li jitkellmu l-ilsien uffiċjali tal-post, ssibhom jużaw djalett, jew lingwaġġ ta' l-istess ilsien f'inħawi differenti tal-pajjiż li jkun. Fi Franza il-Franċiż uffiċjali kif mitkellem f'Pariġi ivarja sew minn dak li jitkellmu l-abitanti ta' Marsilja fin-nofsinhar tal-pajjiż, kif ukoll dawk ta' Bordeaux fil-punent, ta' Lille fit-Tramuntana jew dawk ta' Strasbourg fil-lvant. L-istess fl-Italja, fejn kull reġjun u wkoll kull provinċja ssib li t-Taljan li jitkellmu n-nies tal-post bilkemm jiftiehem mat-Taljan pur tat-Toskana. L-Isqalli, in-Naplitan, il-Pjemontiż huma kważi lingwi fihom infushom li ma tantx jifhmuhom dawk li jgħixu f'reġjuni oħra ta' l-Italja.