L-oriġini tal-parroċċa matriċi u arċipretali ta’ San Nikola tas-Siġġiewi (Belt Ferdinandu)

Abstract

Matul dawn il-jiem ta' festa huma bosta dawk, Maltin u turisti, li jżuru l-Knisja Arċipretali tagħna, mibnija bejn is-snin 1676-1693; veru ġawhra arkitettonika fi stil barokk u wieħed mix-xogħlijiet ewlenin sbieħ tal-famuż Lorenzo Gafà. Din il-knisja imponenti ta' llum għandha ftit iktar minn tliet mitt sena. Il-Matriċi l-qadima, li l-fdalijiet tagħha għandhom jeżistu fi Triq il-knisja l-qadima, aktarx li nbniet iktar minn darba, għax jekk wieħed iqis l-istil korint tagħha, wieħed jista' jgħid li ma kienx ilha mibnija mijiet ta' snin. Fil-waqt, li waħda mit-twieqi tondi tal-ġnub, sa xi żmien ilu kien għad għandha l-grada tal-ġebel, ħaġa li ttik x'tifhem li din il-knisja setgħet inbniet qabel is-seklu ħmistax. Ma nafux jekk din il-knisja l-qadima kinetx l-ewwel knisja parrokkjali tagħna.