Strateġiji ta' rakkuntar fir-rumanz modern Malti : iI-kunflitt bejn il-valuri tradizzjonali u l-liberta individwali

Abstract

Din it-teżi tistħarreġ strateġiji differenti ta' rakkuntar fir-rumanz modern Malti, li żviluppa individwu kontemporanju li jrid jikseb il-liberta intellettwali tiegħu f'konfront ma' istituzzjonijiet u valuri tradizzjonali Maltin. Dan l-iżvilupp fin-narrattiva seħħ minħabba riformi sħaħ soċjali, kulturali, u politiċi li seħħew fis-snin ta' wara l-Indipendenza nazzjonali ta' Malta. Għalhekk, ir-rumanzi analiżżati fil-kapitli li jsegwu nkitbu f'dawn l-aħħar ħames deċennji, u lkoll għandhom l-istess tema ewlenija, jiġifieri protagonist ribelluż li jrid jinqata' mis-sistema li jgħix fiha biex jikseb aktar spazju għall-orjentament psikoloġiku tiegħu. Ir-rumanzi moderni Maltin mistħarrġa huma: Ħdejn in-Nixxiegħa ta' Trevor Żahra, Il-Gidba u L-Istramb ta' Oliver Friġġieri, u Il-Gaġġa u Samuraj ta' Frans Sammut.