Il-kunċett ta' żmien storiku u soċjali fir-rumanz Malti

Abstract

Matul l-eżistenza tiegħu, il-bniedem jagħmel vjaġġ kontinwu ta' tiftix għall-identita nazzjonali, soċjali u personali. L-individwu jittanta jifhem lilu nnifsu f dak li kien, dak li hu u dak li għad irid ikun. L-eżistenza umana tiegħu tinftiehem f'termini spazjo-temporali, li l- kittieba letterarji ta' kull żmien issieltu biex jirrappreżentawha fxogħlijiethom, frott ta' l- istess żmien. Għalhekk, il-letteratura tilqa' l-isfidi u l-kurrenti taż-żmien u taddattahom għal nisġa narrattiva jew poetika li tirrifletti l-istess żmien. Għalhekk, dan l-istudju janalizza l- kunċett ta' żmien fir-rumanz Malti bl-iskop li jispjega kif kull rumanz illokalizzat fi żmien u post partikolari huwa wkoll storiku. Sa miż-żminijiet bikrija tar-rumanz Malti, l-Istorja storika nazzjonali ta' pajjiżna, mimlija konflitti, taqbid bejn ħakkiem u iehor, tkasbir ta' l-imsejkna Maltin u żviluppi progressivi għall-kisba ta' qagħda aħjar, qanqlet bosta interess fl-intellettwali Maltin. Ir-rumanziera tal-bidu bħal Anton Manwel Caruana (1838-1907), Ġuże Muscat Azzopardi (1853-1927), Guze Galea (1901-1978) u Ġuże Aquilina (1911-1997), paxxew il-mentalita kollettiva Ii riedet tiddakkar mit-tagħlim u l-pjaċir ta' l-Istorja nazzjonali. Fit-tieni nofs tas-seklu ghoxrin il-qarrej spostja l-pjaċir letterarju tiegħu għal fuq rappreżentazzjonijiet soċjo-realistiċi. F' dan il-perjodu r-rumanzier modem, hu nnifsu kontributur ta' l-Istorja storika u soċjali, għafas aktar fuq ir-realiżmu biex jipproduċi n-narrattiva tiegħu bħala mera ta' din ir-realta.