Iż-Żmien Nofsani f'Malta ... il-Mosta u lil hinn minnha : xi aspetti ta' interess

Abstract

Ħafna jgħidulek li ż-żmien nofsani Malti (870-1530) mhux ta' min ifakkru. Għalihom, donnu qisu qatt ma kien. Forsi għax dan iż-żmien ma nistgħux norbtuh ma' xi mqades kbar u uniċi bħal dawk ta' Żmien il-Ħaġar jew mas-swar u l-palazzi li ħallewlna l-Ordni tas-Salib bi tmien Ponot. Madankollu, studjużi ta' l-istorja jfakkruna kif dan iż-żmien kien ukoll wieħed li sawwar ir-ruħ u l-ġmiel tal-wirt kulturali Malti , kif nafuh ilium. L-iżvilupp ta' l-ilsien Malti, il-qawmien mill-ġdid tat-twemmin Nisran u ta' l-istituzzjoni tal-Knisja f'pajjiżna kif ukoll l-ismijiet ta' tant inħawi fil-gżejjer Maltin huma biss ftit mill-iżviluppi li seħħew f'dan iż-żmien ta' faqar, għaks u ġuħ. Kien zmien Ii kompla welled l-identita kulturali tagħna u kompla jagħżilna bħala ġens għalih, tant Ii fi Trapani, in-nutara kienu diġa qegħdin iqisu lill-Maltin u l-Għawdxin bħala Nazzjon Malti. Sejrin nagħtu ħarsa lejn xi aspetti mill-ħajja ta' missirijietna f' dawk iż-żminijiet, bil-ħsieb li jiftakkru u jingħataw ġieħ, għax huma wkoll kellhom sehem minn dak kollu li jagħmilna wlied din il-gżira ċkejkna f'baħar kaħlan.