Il-"mara" fil-poeta nazzjonali

Abstract

Fil-ħajja ċelibi li Dun Karm, il-Poeta Nazzjonali, minn jeddu għażel li jsegwi, sikwit insibuh jirreferi għall-"mara"; dik il-figura femminili leggendarja li kitbu dwarha l-akbar imhuh matul medda twila ta' snin f'kull ċivilta. Il-Poeta ta' Malta li l-versi tiegħu waslu fl-ogħla swali tal-arti, tal-kultura u tal-intellettwalita madwar id-dinja, fl-ebda waqt ma nosservawh ibaxxi jew jipprova jisfrutta l-kwalitajiet tal-mara fis-soċjeta . Għall-kuntrarju, fil-bosta drabi fejn huwa jsemmi l-mara, dan jagħmlu dejjem b'ċerta dinjita, b'rispett profond, b'maturita psjkologika. U meta nikkunsidraw il-pozizzjoni tiegħu ta' saċerdot, u saċerdot fi żmien storiku ekkleżjastiku ta' qabel Ġwanni XXIII, f'perjodu aktarx mentalment dejjaq li fih il-Knisja kienet tiskoragixxi referenzi letterarji femminili minn idejn xi letterat religjuż bħal fil-każ ta' Dun Karm, hemm għandu aktar fiex jagħraf il-mohh raffinat u kolt tal-Poeta.