Il-ħajja letterarja ta' Ninu Cremona

Abstract

Ħassejt li huwa tabilħaqq meħtieġ li biex inkunu nistgħu naraw lil Cremona u x-xogħlijiet tiegħu fid-dawl tagħhom, irridu nqegħduhom fuq l-isfond ta’ ħajtu. Minn hawn il-ħtieġa li nagħmel bijografija qasira, imma kemm jista’ jkun dettaljata qabel ma nibda nsemmi x-xogħlijiet tiegħu wieħed wieħed. Billi Cremona, fil-ħajja tiegħu letterarja, l-ewwel beda jikteb bit-Taljan, imbagħad bil-Malti, u fl-aħħarnett bl-Ingliż, se nqassam ix-xogħlijiet tiegħu f’dawn it-tliet taqsimiet ewlenin. Billi mbagħad f’kull ilsien li kiteb, Cremona kien ittratta fuq ħafna materji differenti, kull taqsima tarġa’ tinqasam skond dawn il-materji. Kemm it-taqsimiet ta’ l-ilsna, kif ukoll l-għamliet ta’ kitba ta’ kull taqsima, u x-xogħlijiet kollha, għamilthom wara xulxin f’ordni kronoloġika. Minbarra lista bibljografika li tiġbor fiha xi reċensjonijiet ukoll, u li turi l-egħjun li ħadt minnhom, għamilt ukoll lista tax-xogħlijiet kollha tiegħu f’ordni kronoloġika bid-data fil-parentsi u l-paġna fjen issemmew f’dan ix-xogħol. Fl-aħħarnett irrid ingħid illi l-biċċa l-kbira ta’ l-informazzjonijiet, kemm fuq ħajtu kif ukoll fuq il-pubblikazzjonijiet tiegħu, ħadthom direttament minn fomm is-Sur Nin meta kont immr għandu kuljum bit-‘tape-recorder’ ma’ tul is-sajf tal-1968.