Il-klassi soċjali fir-rumanzi ta' Wistin Born

Abstract

Din id-dissertazzjoni tippreżenta d-diviżjoni soċjali kif uriha Patri Wistin Born fir-rumanzi tiegħu. Huwa jaqsam is-soċjeta' f'żewġ klassijiet ewlenin: il-Klassi tas-Sinjuri u l-Klassi tal-Foqra. Biex joħroġ il-ġerħa tal-qasma soċjali, l-awtur jinqeda b'diversi mezzi, ngħidu aħna, b'kull xorta ta' karattri, b'ambjenti differenti u b'oġġetti materjali li jiddistingwu l-għani mill-batut. L-istudju jesponi d-differenza bejn it-tajjeb u l-ħażin preżenti fil-klassijiet soċjali msemmija fir-rumanzi ta' Born. Fl-ewwel żewġ kapitli jinħarġu l-karatteristiċi tal-klassijiet soċjali u dawn jiġu diskussi separatament. B'hekk tintwera r-raġuni għala Born lil kull klassi ma jqishiex bħala grupp omoġenu wieħed iżda joħloq distinzjoni bejn individwu u ieħor fl-istess qatgħa soċjali. Fi kliem ieħor, Born joħroġ id-differenza kemm bejn is-sinjuri nfushom (xi wħud minnhom baxxi u oħrajn ġenerużi) u kemm bejn il-foqra nfushom (maqsumin bejn dawk li huma baxxi u dawk li huma onesti.) Mill-banda l-oħra, fl-aħħar kapitlu jingħaqdu flimkien iż-żewġ klassijiet biex jinħarġu id-differenzi u r-relazzjonijiet ta' bejniethom.