Il-bidnija- niesha u ġrajjietha

Abstract

Jidhirli li kien għal ħabta ta’ Settembru tal-1998 meta, waqt laqgħa tal-Kunsill Presbiterjali Parrokkjali, l-Arċipriet Dun Joe Carabott kien staqsieni jekk kontx lest li nibda nieħu ħsieb il-knisja tal-Bidnija. Jien aċċettajt bil-qalb għal diversi raġunijiet, imma l-iżjed għax il-Bidnija kont diġà familjari magħha minn meta sirt saċerdot fl-1975. Infatti, meta r-retturi ta’ qabli, Dun Reggie Magri u Dun Ġwann Sammut, kienu jkunu msifrin ħafna drabi kont nitla’ nqaddes u nqarben il-morda jien. Li żgur qatt ma għaddieli minn rasi meta ħadt dik id-deċiżjoni kien li wara 23 sena kont ser inkun għadni nieħu ħsieb il-knisja tas-Sagra Familja. Lin-nies drajthom sewwa, sirt nifhem il-mentalità tagħhom u sirt inħobbhom. Il-knisja żgħira, ġawhra tal-arkitettura, iddisinjata minn Salvatore Zahra u mibnija b’sagrifiċċji kbar minn ftit bdiewa fqar, saret għażiża ħafna għalija, u għalhekk għamilt kull ma stajt biex tinżamm fl-aħjar stat possibbli.