Is-sigurtà fuq il-post tax-xogħol

Abstract

DIN hija ġabra qasira ta' tagħrif u pariri dwar is-sigurtà fuq il-post fejn taħdem. Il-Ministeru tal-Politika Soċjali jittama li din tgħinek iżżomm il-post tax-xogħol tiegħek aktar nadif, pulit, u ħieles għal kollox minn dawk il-perikli li jistgħu jkunu ta' dannu għal saħħtek u għal saħħet sħabek il-ħaddiema. Jekk qatt ikollok xi dubju dwar il-ħarsien tas-saħħa fuq il-post tax-xogħol, titnikkirx iżda ħu parir u staqsi lil min jifhem. Ħajtek u l-ħajja ta' sħabek tkun wisq isbaħ meta fejn taħdmu jkun ħieles għal kollox mill-perikli għas-saħħa tagħkom. L-ebda somma flus ma tista' ġġib lura fuq wiċċ bniedem immankat għal għomru dik it-tbissima li jkun tilef minħabba xi korriment - wisq anqas tista' tinġieb lura ħajja ta' bniedem mitlufa! Nittama li fil-ġejjieni, ħaddiema, sidien u Gvern inkomplu naħdmu flimkien biex nagħtu lil pajjiżna postijiet tax-xogħol li jħarsu dejjem aktar lis-saħħa tal-ħaddiema.