Rikonċiljazzjoni ma' Alla permezz tal-Knisja

Abstract

Jekk hawn ħaġa mportanti fid-dinja, din hi żgur is-salvazzjoni. Tant hija meħtieġa li minħabba fiha l-Iben ta' Alla, il-Kelma Nkarnata daħal fl-istorja umana bħala bniedem, għex, bata', miet u rxoxta. Illum nistgħu ngħidu li aħna salvatti permezz ta' Ġesu' Kristru. Kull ma jonqos biex din is-salvazzjoni tiġi issa effettwata, hu dak li għandu jagħmel il-bniedem. Ġesu', il-parti tiegħu għamilha. Ġie jagħti xhieda għall-Missier, uriena kemm Hu ħanin u ma ħallielna ebda dubju li Alla lest li jaħfrilna dnubietna. Dan it-twemmin, ħakem lill-insara sa mill-bidu u baqa' jiżviluppa saż-żminijiet tagħna bil-prattika u bit-tagħlim tal-Knisja. Ġew żminijiet li fihom il-prattika tal-Knisja kienet tidher iebsa u f'xi każi kienet tassew hekk; imma mal-medda taż-żmien saru żviluppi f'dik il-prattika dejjem kien meqjus bħala ta' mportanza kbira dak it-taħbit li bih wieħed kien jirnexxilu jaqla' l-mahfra. Nistgħu ngħidu anzi li dak it-taħbit kien mgħadud ferm aktar ta' utilita' mill-istqarrija tad-dnubiet. Il-Bibbja u l-kitba tal-Patres dejjem urew li Alla qiegħed jistenna bil-ħerqa li l-midneb jerġa lura biex issehh ir-rikonċiljazzjoni ma' Alla.