Is-saċerdozzju ministerjali fit-tagħlim ta' Ġwanni Pawlu II

Abstract

Għaddew aktar minn għoxrin sena mill-Konċilju Vatikan II, żmien li fih il-Knisja ppreżentat rikezza ta' materjal rigward l-ispiritwalita' tas-saċerdozju. Il-Konċilju li kellu influss qawwi fuq l-iżvilupp dottrinali u fuq il-kuxjenza reliġjuża u morali tal-poplu ta' Alla, iħares lejn is-saċerdot li jridu jkun il-melħ ta' l-art u d-dawl tad-dinja, u ipoġġi fil-prattika l-iżvilupp u d-deċizzjonijiet li kienu jittieħdu. Il-Konċilju jagħraf sewwa l-importanza tas-saċerdoti fittiġdid tal-Knisja. Barra milli ttratta fuqhom fil-Kostituzzjoni Lumen Gentium, ried li jitkellem fuq il-presbiteri f'dokument għalih: iI-Presbyterorum Ordinis. F'diskors lill-kleru Franċiż, il-Papa Ġwanni Pawlu II jgħid, "il-Konċilju Vatikan II reġa' tenna t-tagħlim kollu tal-Knisja fuq is-saċerdozju fil-Kostituzzjoni Lumen Gentium (n.28), u fid-Digriet Presbyterorum Ordinis: - dawn id-dokumenti iqisu l-konsagrazzjoni fid-dawl tal-missjoni ta' l-isqof... Dawn id-dokumenti jkompluhom ħafna dokumenti ohra, l-aktar tal-Papa Pawlu VI". F'dawn id-dokumenti u oħrajn bħal ngħidu aħna Christus Dominus u Optatam Totius, juruna ċar t-tagħlim dommatiku u spiritwali aġġornat u fl-istess ħin juruna d-dinjita' u r-responsabilta' tas-saċerdot [...].