L-ittri tal-alfabetti l-qodma tal-Malti diġitalizzati

David Agius Muscat, lettur tal-Malti fil-Junior College Ġan Franġisk Abela, għadu kemm ħareġ ktejjeb bl-ittri tal-alfabetti l-qodma tal-ilsien Malti. Dawn l-ittri ġew diġitalizzati biex jaqdu lir-riċerkaturi tal-istorja tal-Malti u lill-istudenti tal-Malti tal-Università fit-traskrizzjoni ta’ kitbiet qodma bil-Malti.

L-ittri diġitalizzati tqassmu fuq tliet tastieri b’sett għal kull waħda: Akkademja1, Akkademja2 u Akkademja3. Dawn jaħdmu fis-sistema tal-Windows u fis-sistema tal-Mac u jistgħu jitniżżlu direttament mis-sit.

Din il-ħidma qiegħda tfakkar l-ewwel ċentenarju tal-Akkademja tal-Malti.