Aspetti tat-twemmin popolari fil-leġġendi Maltin

Abstract

L-għan prinċipali ta’ din it-teżi hu li nistħarreġ aspetti tat-twemmin popolari filleġġendi Maltin. L-analiżi tistrieħ fuq 29 intervista li kelli ma’ parteċipanti minn lokalitajiet differenti, kif ukoll fuq ġabra ta’ leġġendi li ġbart minn diversi sorsi ppubblikati. Il-leġġendi jagħmlu parti mill-qasam tat-tradizzjoni orali, jikkonsistu minn rakkont ta’ ġrajja li fiha element maġiku kif ukoll doża ta’ realtà. Fl-imgħoddi, aktar mil-lum, iI-leġġendi kienu jingħadu biex wieħed jesprimi l-biżgħat u dak kollu li jkun qed jippreokkupah. It-tieni kapitlu ta’ din it-teżi jersaq lejn id-definizzjoni tat-terminu leġġenda, kif ukoll jiddistingwi d-differenza bejn leġġenda u ħrafa. Dan l-istess kapitlu jippreżenta l-karatteristiċi u t-temi ewlenin tal-leġġendi. It-tielet kapitlu jiffoka fuq ilġabbara ewlenin tal-leġġendi u s-sejbiet tagħhom. Ir-raba’ kapitlu jispjega lmetodoloġija ta’ din ir-riċerka u l-għodda li ntużat waqt l-istħarriġ kwalitattiv li sar. Kull intervista li saret ġiet traskritta u hija ddokumentata f’Appendiċi B, filwaqt li rrekordings tal-istess intervisti jistgħu jiġu aċċessati minn din il-ħolqa: https://drive.google.com/drive/folders/1ZupUHmg702NovchZ2COX1KdMlXFWKa0H ?usp=sharing. Il-ħames kapitlu jinkludi l-analiżi tal-leġġendi kollha li ġbart kemm minn sorsi ppubblikati kif ukoll minn fomm in-nies. F’dan il-kapitlu analizzajt illeġġendi u l-varjazzjonijiet li sibt kemm minn dak li qaluli l-parteċipanti kif ukoll millkotba permezz tal-ġabra li tista’ tinqara minn Appendiċi Ċ. F’din it-taqsima rajt issimilaritajiet u l-kuntrasti li spikkaw fil-leġġendi Maltin u Għawdxin. L-aħħar kapitlu jistabbilixxi s-sejbiet ewlenin ta’ dan l-istudju u jissuġġerixxi riċerki futuri oħra li jistgħu jsiru f’dan il-qasam.