Mill-Arkivji : Programme 86 : Arnold Cassola

Abstract

Il-Professur Arnold Cassola huwa l-mistieden fil-programm ‘Mill-Arkivji’ tat-2 ta’ Frar 2025. Huwa se jkellimna fuq ir-riċerka li għamel f’diversi arkivji sew f’Malta, wisq aktar barra. Il-Professur Cassola huwa riċerkatur, storiku, awtur ta’ diversi papers akkademiċi u editur ta’ diversi pubblikazzjonijiet. Huwa senior fellow fil-letteratura Maltija komparattiva fl-Università ta’ Malta. Il-Prof. Cassola ilu snin twal involut fil-politika f’Malta, l-Italja u f’qasam internazzjonali. Matul din is-siegħa, Il-Prof. Cassola se jkellimna fuq kif bdiet ir-riċerka tiegħu fl-arkivju ta’ Istanbul f’dokumentazzjoni li toħodna lura għall-Assedju l-Kbir. Kif l-Ottomani ħarsu lejn Malta? Jissokta fuq riċerka li għamel fil-Biblioteca Vallicelliana f’Ruma fuq id-dokumentazzjoni għar-regoli tal-lingwa Maltija. Hawn jirreferi għall-ewwel dizzjunarju grammatika tal-ilsien Malti. Kif kienet din l-esperjenza f’din il-bibljoteka? Matul il-programm jagħmel enfasi fuq il-Maltin fi Trapani u f’Corfu, l-esperjenzi tiegħu fir-riċerka li għamel fuq din id-diaspora. Fl-aħħar tad-diskussjoni, Cassola jirreferi għal studju li għamel fuq Brighella u Thezan rigward il-proverbji Maltin u Sqallin b’referenza għal Cantilena.