Mill-Arkivji : Programme 87 : Matthew Balzan u Conrad D'Amato

Abstract

Is-sinjuri Conrad D’Amato u Matthew Balzan huma l-mistiedna fil-programm ‘Mill-Arkivji’ tad-9 ta’ Frar 2025. Huma se jkellmuna fur ir-riċerka li għamlu għall-pubblikazzjoni ‘Birżebbuġa: Storja u Kultura’ maħruġ fl-2017. Is-Sur Balzan ħa ħsieb il-kontenut dwar l-arkeoloġija u l-istorja militari, filwaqt li s-Sur D’Amato ħa ħsieb l-aspett soċjali u reliġjuż.

Conrad D’Amato huwa edukatur. Huwa gradwa fis-Servizzi Bankarji u Finanzjarji, kif ukoll fil-Filosofija u t-Teoloġija. Huwa ggradwa bħala għalliem fl-iskejjel sekondarji wara li kiseb il-P.G.C.E. Fl-2019 kiseb il-maġisteru fl-Etika tan-Negozju. Bejn l-2004 u l-2019 ħadem fis-settur bankarju, u llum jaħdem bħala għalliem tas-sekondarja. Iħobb il-letteratura Maltija u huwa awtur ta’ numru ta’ artikli, poeżiji u drammi. Huwa awtur ta’ pubblikazzjonijiet storiċi ‘Nofs Seklu ta’ Mixja Mużikali’ (2007), ‘Il-Vara Titulari ta’ San Pietru’ (2009) u ‘Ramel Dehbi f’Baħar ta’ Storja’ (2013). Għal snin twal ilu jservi fl-‘Għaqda Storja u Kultura Birżebbuġa’.

Is-Sur Matthew Balzan huwa gradwat fl-istorja u l-arkeoloġija u għandu maġisteru fl-Istudji Ospidalieri Fil-preżent huwa impjegat ma’ Heritage Malta bħala Kuratur Anzjan tal-Fortifikazzjonijiet. Kiseb ukoll rikonoxximent mill-Awtorità Maltija għat-Turiżmu għal xogħlu f’diversi siti storiċi fl-2009. Matthew huwa involut ukoll fit-teatru u għandu diploma maħruġa minn Trinity College London fl-2012.

Ir-riċerka tagħhom toħodna f’diversi arkivji f’Malta,l-aktar fl-Arkivji Nazzjonali u l-Arkivju tal-Kattidral fl-Imdina. Huma komplew jirriċerkaw fl-Arkivju Nazzjonali f’Londra, esperjenza li jixtiequ jkollhom opportunità oħra li jkompli j irriċerkaw fuq dan is-suġġett.

Matthew joħodna lura fis-snin fi vjaġġ ta’ storja intensiva minn Għar Dalam sal-ewwel bombi li niżlu fit-Tieni Gwerra Dinjija. Conrad jiffoka fuq ir-riċerka li għamel fuq id-dokumenti tas-Segretarju Ewlieni tal-Gvernatur fl-Arkivji Nazzjonali u fuq il-Visti Pastorali fl-Arkivju tal-Kurja fil-Floriana u dak tal-Kattidral fl-Imdina. Jitkellem ukoll dwar il-bini tal-knisja parrokkjali u kif saret iddedikata lil San Pietru.

F’din l-intervista joħroġ ċar kemm Birżebbuġa għandha storja interessanti.