Editorjal : il-Franġiskani tal-kustodja fil-Libanu

Abstract

Ilna aktar minn sena naraw xeni ta’ qerda u vjolenza fl-iStrixxa ta’ Gaża, b’aktar minn miljun u nofs persuni li sfaw sfullati u kellhom jaħarbu minn djarhom aktar minn darba, taħt pressjoni tal-qawwiet tad-difiża Israeljani li qed jattakkaw żoni li huma jqisuhom bejtiet ta’ terroristi tal-moviment Ħamas. Sa mill-bidunett tal-gwerra, fis-7 ta’ Ottubru 2023, kien hemm reazzjoni ta’ tpattija għall-attakki u l-qerda tal-bombi Israeljani mhux biss mill-milizjani tal-Ħamas f’Gaża, imma wkoll minn dawk tal-partit tal-Ħiżbollah fil-Libanu. Mill-ewwel jiem tat-tensjonijiet bdew jiġu sparati missile fuq it-tramuntana tat-territorju Israeljan li hu l-fruntiera mal-Libanu. Israel ma damx ma wieġeb għal din l-aggressjoni billi issa fetaħ attakki ħorox fuq il-fortizzi tal-Ħiżbollah fin-nofsinhar tal-Libanu, fil-belt ta’ Beirut u fil-Wied tal-Bekaa fil-lvant tal-Libanu. Imma ma kienx kuntent biss li jattakka dawn iż-żoni, imma saħansitra wkoll żoni oħrajn fejn ma hemmx elementi estremisti tal-Ħiżbollah, u fejn jgħixu l-Insara Maroniti tal-Libanu, l-aktar fit-tramuntana tal-pajjiż.