Kemm se ttina dik it-tina?

Abstract

Il-Baruni tar-Rabat tal-lmdina' hija waħda minn sensiela ta' novelli mifruxin f'erba' volumi, miktuba minn Mary Meylak li jdawruna ma' nħawi differenti f'Malta u f'Għawdex. Din in-novella tirrakkonta l-istorja ta' siġra kbira tat-tin li kibret fil-ġnien ta' villa ta' Baruni. Ir-rakkont jibda bil-baruni josserva t-tfal li jiġru mat-toroq jixxennqu meta jħarsu lejn il-ġnien mimli frott tiegħu u, għax qalbu tajba, jordna lill-ġardinari tiegħu biex iħawlu siġar tal-frott b'tali mod li jibdew jarmu fuq barra tal-ġnien ħalli t-tfal ikunu jistgħu jaqtgħu kemm frott iridu. It-tina li titħawwel tant tikber li tarmi dell fuq ħafna toroq fir-Rabat u l-Imdina u ssir leġġendarja. Jum fost l-oħrajn, tiġri x-xniegħa fost in-nies tal-lokal, li kienu ġejjin tas-sanità biex iqaċċtu s-siġra. U hawn għoddu jqum irvell għax in-nies ma ridux lill-awtoritajiet iqaċċtulhom is-siġra leġġendarja tagħhom. L-awtoritajiet ma jqaċċtuhiex imma xi ħaġa tiġri fil-fatt u s-siġra tibda tmajna. Xejn donnu ma seta' jirranġa s-sitwazzjoni, lanqas l-aqwa ġardinari ta' Malta. Imma jum fost l-oħrajn, jitfaċċa tfajjel li, anki b'sogru kbir għal ħajtu, iħaffer madwar is-siġra, jinżel fil-fond u jintebaħ li s-siġra kien naqsilha l-ilma tal-qiegħ u jinnaviga b'tali mod li jibda jiskula l-ilma mill-ġdid lejn l-għeruq biex is-siġra tirpilja minnufih u r-Rabat u l-Imdina, anzi Malta kollha, terġa' tibda tgawdi mill-benna tat-tina.