'Il-Lhud' fl-Evangelju skont San Luqa u fl-Atti tal-Appostli (1)

Abstract

L-Evanġelista San Luqa huwa uniku fost l-erba’ Evanġelisti għall-fatt li ma kitibx biss l-Evanġelju, imma segwa din l-ewwel kitba tiegħu bit-tieni volum, dak li aħna nsejħulu l-Atti tal-Appostli. Dan ifisser li jekk irridu nippruvaw nistudjaw xi tema partikulari mill-Evanġelju skont San Luqa, ma nistgħux nagħlqu għajnejna għall-Atti tal-Appostli. Dan jgħodd b’mod speċjali għall-mod kif dan l-awtur jitratta l-poplu Lhudi/Iżrael fiż-żewġ xogħlijiet tiegħu. L-attitudni ta’ San Luqa lejn il-Lhud aktarx li hija wieħed mill-aktar suġġetti kontroversjali fl-istudji kontemporanji ta’ Luqa-Atti. Dan minħabba l-fatt li l-evidenza f ’dawn iż-żewġ kitbiet ta’ San Luqa twassalna f ’direzzjonijiet differenti fl-istess ħin: Luqa- Atti huma fost l-aktar kitbiet favur il-Lhud u fl-istess ħin huma wkoll fost l-aktar kitbiet kontra l-Lhud fit- Testment il-Ġdid.