It-tagħlim tal-grammatika tal-lingwa nattiva b’mod differenzjat

Abstract

Dan ix-xogħol hu maqsum f’żewġ partijiet. L-ewwel taqsima tittratta dwar it-tagħlim tal-grammatika tal-lingwa nattiva tal-istudenti b’enfasi fuq it-tagħlim differenzjat. Aħna konxji mil-livelli differenti li jeżistu fl-iskejjel sekondarji tagħna allura b’dan il-mod ħejjejna din ir-riċerka dwar studji li saru dwar dan is-suġġett partikulari. Il-grammatika tidher bħala qasam diffiċli u astratt sabiex jinftiehem mill-istudent, b’hekk permezz ta’ din ir-riċerka li ħejjejna, fhimna li kontinwament irridu nħajru u nistimulaw lill-istudenti sabiex jibdew japprezzaw il-lezzjonijiet tal-grammatika. It-tieni taqsima tindirizza lill-istudenti tat-Tieni Sena Sekondarja u tippreżenta tliet riżorsi differenzjati u kreattivi li l-għan tagħhom huwa li nrawmu kurżità flistudenti għat-tagħlim tal-grammatika u fl-istess waqt noħolqu esperjenza ta’ tagħlim effettiv fejn kulħadd jista’ jipparteċipa bl-aħjar mod possibbli. Permezz ta’ dawn ir-riżorsi, l-istudenti se jkunu parteċipi kemm fiżikament permezz tal-logħob, taħbil il-moħħ u anke bis-saħħa ta’ attivitajiet livellati u gradati skont il-livell akkademiku tagħhom.