L-Antifona Beate Juliane (1893) ta’ Dr. Paolo Nani: l-ewwel parti

Abstract

Dis-sena għażilt li nlaqqagħkom mal-Antifona Beate Juliane li ġġib id-data tas-17 ta’ Awwissu 1893. Dan ifisser li dis-sena jaħbat għeluq il-120 sena minn meta Mro. Dr. Paolo Nani kiteb din l-Antifona. Għal dan il-għan, ser niddedika dan l-artiklu (f’żewġ partijiet) għal waħda mill-eqdem teżori mużikali prezzjużi li seta’ kellna ġo San Ġiljan. Ngħid seta’, għax għal raġuni li s’issa mhix magħrufa sewwa, din l-Antifona, li oriġinarjament kienet inkitbet minn Nani nnifsu espressament biex tindaqq fil-festa titulari ta’ San Ġiljan ġewwa r-raħal marittmu li jġib l-istess isem, spiċċat iddedikata lill-Qaddisin Martri Krispin u Krispinjanu! Partitura oriġinali tal-Antifona, flimkien mal-partijiet għall-orkestra u l-vuċijiet, kemm ta’ San Ġiljan, kif ukoll tal-aħwa Qaddisin Martri, illum il-ġurnata huma kollha kkonservati fl-Archivum Cathedrale Melitense u arkivjati taħt Mus. Ms. 1560. Hawn nixtieq nirringrazzja lill-kuratur tal-mużew tal-Imdina, u b’mod partikulari, lill-arkivista Mario Gauci tal-għajnuna li dejjem sibt mingħandu kemm domt nirriċerka fuq dan ix-xogħol. Għaldaqstant, f’din l-ewwel parti ser inkun qed niffoka l-aktar fuq ix-xogħol in ġenerali, mingħajr ma noqgħod nidħol f’xi forma ta’ analiżi dettaljata. Dan ser inħallih għat-tieni parti, fejn ser ikun qed niddiskuti l-Antifona mill-aspett mużikali f’dik li hi forma u t-taqsimiet varji tagħha, kif ukoll inkun qed nanalizza bl-akbar reqqa l-ħjut mużikali li minnhom hi msensla din l-Antifona. Dan kollu, naturalment, ikun sostnut b’eżempji mużikali rilevanti u tabelli biex nagħmilha aktar faċli lil dak il-qarrej kurjuż li ikun jixtieq iterraq miegħi dan il-vjaġġ li eventwalment ser iwassalna għalbiex napprezzaw aktar dan il-wirt mużikali li ried iħallilna Nani.