L-Innu tal-Banda ‘Sant’ Andrija’ : l-ewwel parti

Abstract

Fost il-ħafna baned li qed jiċċelebraw il-150 anniversarju mit-twelid ta’ Mro. Antonio Miruzzi hija l-Għaqda Mużikali ‘Sant’ Andrija’ ta’ Ħal Luqa. Fis-17 ta’ Marzu li għadda ġejt mistieden biex nattendi għal serata mużikali fis-sede tal-Każin li, matulha tnediet CD ġdida ta’ marċi funebri mill-pinna tiegħu. Ta’ min jgħid li, fit-tmien snin li hu serva bħala surmast-direttur ta’ din il-Banda Luqija, Mro. Miruzzi ħallielha repertorju ġmielu ta’ xogħlijiet mużikali fosthom, l-Innu tal-Banda. Huwa proprju għalhekk li, jiena għażilt li nikteb l-artiklu tiegħi dwar dan l-innu. B’hekk, jien ukoll inkun qed ningħaqad mal-bqija tas-soċjetajiet mużikali Maltin l-oħrajn kollha f’din iċ-ċelebrazzjoni tant mistħoqqa biex tfakkar għeluq sninu. Mro. Miruzzi kien wieħed mill-kompożituri l-aktar prolifiċi li qatt rat Malta fil-qasam bandistiku bejn l-aħħar deċennju tas-seklu dsatax u l-bidu tas-snin tletin tas-seklu li għadda. Minn hawnhekk nixtieq inrodd ħajr lil Bernard Cutajar, l-arkivista tal-Banda ‘Sant’ Andrija’ tat-tagħrif li għoġbu jgħaddili biex stajt ninseġ dan l-artiklu.