Id-diminuttiv u l-akkrexxittiv fil-Malti

Abstract

Din it-teżina hija mqassma fi tliet kapitli. L-ewwel kapitlu jinqasam fi tnejn. L-ewwel parti tittratta d-diminuttiv u l-akkrexxittiv b’mod ġenerali, kif jaħdem f’lingwi differenti speċjalment f’varjetajiet tat-Taljan u l-Għarbi. It-tieni parti ddur għadd ta’ studji grammatikali u teżamina dak li nkiteb dwar id-diminuttiv u l-akkrexxittiv fil-Malti.

It-tieni kapitlu huwa dak tal-metodoloġija li jitkellem dwar kif inhi mqassma l-ġabra, u jinkludi l-ġabra nnifisha. Il-ġabra hija maqsuma f’seba’ tabelli, erbgħa għad-diminuttiv u tlieta għall-akkrexxittiv. It-tabelli jagħmlu differenza bejn il-forom introflessivi u l-forom konkatenattivi u dawk li għandhom forma mibnija b’iżjed minn affiss wieħed bħal tortellini (torta) li għandha żewġ suffissi diminuttivi: -ell u -in.

Fl-aħħar kapitlu, dak tal-analiżi, niddiskuti l-metodi possibbli li bihom jifforma kemm id-diminuttiv u kemm l-akkrexxittiv. Nitkellem ukoll dwar fatturi oħra li ħarġu mill-ġabra, bħat-tifsir tad-diminuttiv u l-akkrexxittiv u t-tibdil fil-ġens.