Il-haga mohgaga : analizi lingwistika

Abstract

Din it-teżina hi maqsuma fi tliet partijiet ewlenin. Fl-ewwel kapitlu nagħti deskrizzjoni ġenerali tal-logħob bil-kliem, peress li l-ħaġa moħġaġa hi essenzjalment logħba lingwistika. Wara li niddiskuti modi differenti kif nilagħbu bil-kliem fil-Malti, nagħti definizzjoni tal-ħaġa moħġaġa u niġbor xi nkiteb dwarha minn studjużi Maltin u barranin. Fit-tieni kapitlu nippreżenta ġabra ta' madwar 100 ħaġa moħġaġa, uħud bil-varjanti tagħhom, ikklassifikati skont it-temi li jittrattaw. Il-ħwejjeġ moħġaġa ġbarthom minn madwar 100 ruħ minn 24 lokalità ma' Malta u Għawdex. Qabel il-ġabra niddeskrivi l-metodoloġija, jiġifieri t-tfassil tal-kwestjonarju, l-istudju pilota u xi diffikultajiet li ltqajt magħhom.

Fit-tielet kapitlu, abbażi tal-ġabra tiegħi u ta' ġabriet oħrajn bħal ta' Cassar Pullicino, nanalizza l-karatteristiċi ewlenin tal-ħaġa moħġaġa Maltija. L-analiżi tinqasam f’ erbgħa. Fl-ewwel parti nittratta l-għamla tal-ħaġa moħġaġa; it-tip ta' versi, ir-rima u elementi oħrajn. It-tieni parti hija dwar it-temi li nsibu ta’ spiss bħall-partijiet tal-ġisem, l-oġġetti tad-dar, ir-relazzjonijet mal-familja, l-annimali u l-insetti u ħafna oħrajn. Fit-tielet parti hemm element komparattiv bejn il-ħwejjeġ moħġaġa tradizzjonali u dawk moderni, imbagħad insibu xebh bejn dawk Maltin ma’ dawk li huma barranin. Fl-aħħar parti nuri kif taħdem il-ħaġa moħġaġa billi nistħarreġ il-mekkaniżmi ewlenin li jsawruha, bħall-metafora, is-sineddoke, l-antiteżi u oħrajn.