Inkanta bl-ilsien Malti : Gaetano Buttigieg u l-kanzunetta popolari

Abstract

Flimkien ma’ xogħlijiet oħra, din it-teżi tkompli tiċċara l-isfond imżewwaq li fuqu żviluppa l-ilsien Malti tul dawn l-aħħar ħamsin sena, b’referenza speċjali għall-qasam tal-kanzunetta popolari, li fih diversi artisti ħaddmu l-lingwa bi mħabba u b’ħila fl-għeruq, fost il-poplu. L-istudju jiffoka fuq il-ħajja u l-ħidma ta’ Gaetano Buttigieg (1923-2004), meqjus bħala wieħed mill-aqwa esponenti tal-użu ta’ lsienna f’dan il-qasam. Ix-xogħol jiġbor fih it-tagħrif bijografiku, kif ukoll il-produzzjoni sħiħa li nstabet s’issa ta’ dan l-artist prolifiku. Fih ukoll l-ewwel passi ta’ valutazzjoni tal-opra ta’ Buttigieg permezz ta’ stħarriġ tal-kontenut u tal-ħila artistika fit-twassil tiegħu. Wara li tistħarreġ sa fejn l-artist irnexxielu jinterpreta l-gosti tal-Maltin u fiex kien impuls innovattiv għal żmienu, it-teżi terġa’ tqiegħed lura l-ħidma tiegħu fi ħdan l-isforz nazzjonali kollettiv lejn il-qawmien tal-Malti.